【头条独家】为旧爱孭巨债卖楼都唔掂 曹思诗扑水自救拒受「照顾」

去年离开TVB成为「晶女郎」（王晶旗下），现年28岁的曹思诗（CC）拥有32C-24-33火辣身材加埋坚挺「蜜桃臀」，真系有样有身材，睇到宅男好心动㗎！原先发展得几顺畅，可惜因为遇人不淑，旧爱不停以她名义四出借钱，累她欠下630万元巨额债项，至今对方更人间蒸发，作为担保人的CC要孭巨债上身，被逼卖楼填氹！日前本报记者见曹思诗同现任老外男友喺上环一间Cafe放狗食嘢，见她心神恍惚，拖狗时更几乎仆亲，之后仲喺公园喊住讲电话添，真系好阴功呀！ 采访：方骞平、李维隆

近日曹思诗为扑水劳心劳力而病倒，记者目击见她同男友撑枱脚期间都不停咳嗽，且全程慌失失不停两头望！拖狗时更险些仆亲，好彩及时掹实男友。两人带小狗回爱巢后孖住落公园做咗阵运动，明显呢期CC连做运动都冇晒心机，比起最fit时候有个小肚腩，幸而卖点「蜜桃臀」keep得住，着住贴身运动裤都仲见到弹弹吓。及后男友先行离开，CC独坐公园一角打电话畀朋友诉苦，愈讲愈激动，忍唔住攞纸巾抹泪，跟住再上楼拎咗大叠文件去咗银行继续处理债务问题。

CC接受本报电话访问时坦承就算成功急售将军澳层物业都搞唔掂条数，「因为单系帮佢（前度男友）用信用咭透支，都成60、70万，预计仲要贴多30几万，最惨租约要到明年5月先完，𠵱家个租客唔肯提前搬走，亦唔畀人上去睇楼，目前欠下巨额嘅月息要10几万，层楼愈迟成交就愈大镬，妈咪要卖晒内地股票套现畀我；爸爸攞晒啲钱出嚟帮我；识嘅朋友都借哂畀我顶住嚟交月息，负担好重，压力好大，最惨好多人以为我系同谋，系女骗子。呢个『宝贵』教训真系令到我好抑郁、好崩溃，本身可以好好咁生活，𠵱家系我冇脑连累埋屋企人受苦，真系好过意唔去，一度谂过喺佢屋企轻生，等佢一世都唔安乐，但谂深一层，我要留低照顾家人，唔好做傻事，钱解决到问题就唔系问题，希望可以尽快卖楼解决问题，重新开始。」