【头条独家】42岁Fit过做女嗰阵 黎淑贤食电子烟食得好鬼祟

95年亚姐季军黎淑贤(Bonnie)好厉害，虽然42岁又生咗四个仔，但身形仲Fit过选亚姐嘅时候。为咗凑仔，Bonnie好早已淡出幕前，话咁快大仔Jacky已经20岁，但二至四公子分别13、11及7岁，年纪尚轻仲未甩到身。上周二下昼，Bonnie同一男一女友喺铜锣湾开餐，食饱嚟一个事后电子烟，食食吓发现记者，Bonnie好惊即刻埋单走人。采访:梁志明

Bonnie今年42岁生日，美容医生老公许智政为佢举行生日Party，有一班好朋友贺佢之外，家中「4条King」，即是四个宝贝仔都在场同妈咪庆祝，有老公锡，囝囝又孝顺，难怪愈嚟愈靓，愈大愈紧致啦。

唔想畀人见到食烟
Bonnie虽然无再拍戏但有时间都会出席商业活动赚外快，平时除咗凑仔，一有时间就会去老公位于铜锣湾间美容中心，话晒代言人，都要Keep住靓嘅。当日下昼2点，Bonnie同两位友人去百德新街一间冰室食Lunch，坐Outdoor嘅佢饭后速叹支电子烟，吞云吐雾间发现有镜头，Bonnie吓到缩一缩又即刻埋单走，一路行一路搵镜头，再发现记者后眼神唔多友善，然后急急脚行返老公间美容中心。