【头条独家】带阿谭睇起龙舟食和味龙 鼎爷爆孙仔有望传承厨艺
2019-12-16 01:39 
李家鼎和谭玉瑛合作主持的《阿爷厨房》最近推出第四辑，两人都话愈拍愈有默契，鼎爷当正阿谭好似孙女一样，两人今次去到顺德和鼎爷家乡南海搵食，难得睇到起龙舟，同一尝和味龙隆（龙虱）。不过，两人虽然经常有机会食好嘢，但明白做食肆不易，尤其做了老板的鼎爷有更深体会，他更自爆孙仔有望传承他的好厨艺。撰文：杜淑霞 摄影：李权威
今次到顺德和南海拍外景，鼎爷大呻拍得特别辛苦，「我哋5、6月去拍，日日都好好天，但有成3、40度，热过香港，真系差啲热到晕低，死顶住咋！」阿谭亦大赞鼎爷专业，「佢明明好唔舒服，但系一埋到位对住个镜头就好似冇事咁，真系好厉害。」
愈食愈嘴刁
谈到精彩内容，两人最开心睇到起龙舟，鼎爷说：「我哋细个睇过，嗰时香港都有㗎！𠵱家好少地方有得睇罗！」阿谭亦谓：「虽然嗰日我哋企咗喺桥度三粒钟，但系都唔觉得辛苦。」讲到食方面，阿谭话最难忘食了水曱甴，「我真系第一次食咋！最初都惊惊哋，但食落都冇乜嘢。」
鼎爷又爆阿谭愈食愈嘴刁，但两人都唔会踩人哋煮嘢食，特别是开了食肆做老板的鼎爷，「做咗老板更加费事评价人哋啦！同埋都明白做生意真系好艰难，好彩自己啲生意暂时冇乜问题。」谈到两个囝囝都开食肆，能否承继他衣钵学到一手好厨艺呢？鼎爷说：「大仔都有学厨，但煮西餐叻啲，细仔煮冇天份只识食，反而孙仔最近竟然锺意玩煮饭仔，仲会跟住啲步骤，但系佢𠵱家仲细（3岁），希望佢将来真系锺意学啦！」
最新回应