【头条独家】宇宙最强「收山」唔拍功夫片 甄子丹行超巿乐做老婆阿四
2019-12-06 21:30 
「宇宙最强」甄子丹除咗打得，仲出晒名锡老婆汪诗诗，二人结婚16年依然恩爱，皆因丹爷讲过乜都畀晒老婆，绝对系百分百嘅「爱妻号」。虽然佢拍亲戏啲片酬都亿亿声，但56岁的丹爷上周三（11月27日）宣布拍埋《叶问4》就「收山」唔再拍功夫片，似乎想留多啲时间陪老婆仔女。日前Free番好多嘅丹爷，一身街坊look陪素颜太太诗诗到中环行超市。见他跟住老婆去拣好多食品，两人又商量买咩调味料，短短半个钟手推车两个篮Full晒。之后负责查数嘅诗诗畀完钱，丹爷就醒目地用手推车将三大袋食品推落楼下攞上座驾，全程亲力亲为，搞掂晒再拖住爱妻到四季酒店撑枱脚。见诗诗食饭时笑得好甜，就知呢个「阿四」有几成功啦！采访：张咏森
丹爷为咗头家多年来搏到尽拍戏，最威水系饰演「叶问」呢个角色，10年前拍完第一集劲受欢迎，到10年后拍到《叶问4》居然仲有捧场客，难怪丹爷都话要多谢大家咁多年嘅支持。不过他觉得见好就要收，上周三（11月27日）为本月上映的《叶问4》出席宣传活动时，他坦言今集唔单只系《叶问》系列嘅最后一集，亦都系佢最后一套功夫片，他解释：「拍咗咁多电影，功夫片差唔多喇，《叶问4：完结篇》作为我嘅最后功夫片，希望可以写下宝贵嘅一页。」其实有咁嘅决定，唔多唔少都系为咗老婆同仔女，因诗诗曾叹老公拍戏唔定时，连假期都冇得预，通常要到last minute先知道，加上丹爷都56岁，系时间要享受人生，留多啲时间陪屋企人。
店员赞Fit
日前就见丹爷一身街坊look陪住太太诗诗偕家佣姐姐到中环ifc的Citysuper扫货，只见他们一入内先拣蔬菜生果，然后再去买冻肉和奶品等。跟住又去买面和买米，佢哋买得最开心应该系调味料，因为佢哋会互相畀意见，看来两公婆都锺意玩吓煮饭仔。后尾他们分开再睇下有冇漏网之鱼，只见丹爷好锺意食Nuts，见到有得试食，佢都唔执输，仲食到津津有味，试完后就买咗两包，绝对系上等人，最后仲买了支酒。虽然丹爷戴帽又戴黑超极低调，但点会冇人认得「宇宙最强」呢？其间有些店员姐姐大赞：「佢真人都几Fit喎！」
老婆满意
买咗大约半个钟，一架手推车两个篮载到满满的，跟住佢Join番老婆去排队畀钱。只见诗诗负责找数，丹爷就同工人姐姐将食品放入环保袋，足足放满三大个咁多。之后丹爷用手推车载住三大袋食品推落楼下攞上座驾，全程亲力亲为，十分贴地，难得丹爷唔介意做阿四，而诗诗就舒舒服服在旁等候。丹爷搞掂晒就轻轻松松拖住老婆去隔离嘅四季酒店食Lunch，见诗诗坐低后笑得好甜，似乎好满意老公嘅表现，超开心！
最新回应