【头条独家】发文控诉中TG苦况 黄泽锋妻惨被抽Job兼攻击

今年7月，黄泽锋太太陈丽丽以52岁高龄诞下囡囡「小黄妃」，两公婆开心到飞起，乜都以宝贝女为先。家住屯门的他们，全家中晒催泪烟，「小黄妃」食人奶后，搞到身体出晒红疹，又痕又痛又忟憎，两公婆睇见就心痛。日前陈丽丽喺社交网站发文控诉：「点解？你可以有装备去应付！点解？平民百姓就要赤条条去受这痛楚！」事后她被恶意攻击，有人inbox閙她：「系咪老懵咗？定产后抑郁发作？」亦因为风头火势，部份Job都被Cut，非常无辜。采访：方骞平

食TG后，黄泽锋狂咳，两母女就持续出红疹。幸好「小黄妃」得4个月人仔只会喊，未识得搲，唔怕会搲损留痕。陈丽丽说：「根据卫生防护中心提醒哺乳妈妈，接触催泪气体后两小时避免喂母乳，我有按指引去做都唔得。日前我带BB去覆诊都再有请教医生点样去解毒，连医生都冇能为力，因为根本冇人清楚TG成份，唯一只能处方类固醇顶住先！」

患处涂人奶
黄太深感无奈不断唉声叹气，「唉，真系好无助，其实经已尽量少带个女落街，逼不得已先抱埋佢落去买餸，依家我耳背、胸口都出咗红疹，而且扩散上颈，部份仲恶化到有脓头，患处好㷫。我只能喺患处搽返自己嘅人奶去自救，先用BB消毒纸巾抹乾净，底层先搽浸BB油，跟住再揩人奶落去，风乾后再搽啲纯天然既金盏花膏同茶树膏，至于小黄妃个大髀都出到一挞挞，佢都系搽我啲药膏同人奶。」

被网民曲解
对于被围攻，陈丽丽好嬲，但最嬲系被网民曲解咗意思，她为当日出post解话：「其实我冇怪责警察用催泪弹驱散示威者，但唔赞成佢哋无缘无故，喺冇需要情况下对住空气乱射TG，咁样会令到市民受苦。虽然唔系百份百赞同警方做法，但唔代表系敌对立场，我只系用妈妈视觉出发，希望可以保护到家人，唤起大家关注啫。」