【头条独家】食店蚀钱个唱煞停 黄翊叹就快要乞食

受社会气氛影响，饮食业首当其冲，演艺界同样受波及，等咗26年终于可以喺乐坛翻生的黄翊竟然「中」两瓣，在大埔墟街市顶楼经营的食店生意急跌7成，每晚黄金时段得返几枱客，蚀到入肉！原先打算明年4月喺麦花臣再开演唱会都急急煞停：「人哋张敬轩演唱会都要取消啦，你系黄翊啫，唔系叫取消，系收皮呀。再咁落去，我哋咪要eat banana？」采访：方骞平

食店蚀钱，演唱会又被叫停，黄翊相当无奈，他说：「我哋做夜市生意更加难搞，因为交通问题，入夜啲人就唔出街，放工即返屋企食饭，扶老携幼更加唔方便，怕冇车搭，之前黑衣人曾破坏过我哋熟食街市嘅大堂，要围板装修5日，加埋大埔堵路，做咗十几年生意从未试过差成咁，好老实讲，我都想你可以教吓我点算好。」

无晒办法好头痕
问到应变方法，黄翊坦言无晒计，「真系要去问高人，自问智商好低，谂唔到有乜方法可以解决到，我真系好烦。都冇乜应变办法，因为食店喺政府大楼经已减租一半，所以申请唔到中小型饮食业应急钱，师傅做咗好多年就冇得Cut，一样都系咁嘅粮，唯一尽量叫散工唔使返工。」黄翊愈讲愈灰，「唯有坚守香港精神捱住先，顶得就顶，希望香港状况可以平息得到，但相信需时较长。不过，因为过年后街市要大装修半年，哈！嗰半年唯有拎枝结他去隧道乞吓食度日，到时经过见到黄翊唔好畀硬嘢，最少都畀两条嘢我，要软嘅。」

讲到喺乐坛难得翻生，黄翊更气馁：「我冇唱20几年歌，直至两年前受到大家注意可以出返嚟，谂住努力想做啲嘢，本身想再搞演唱会，依家都唔敢再搞住，好彩之前申请场地系后备第4，排到第3个已经攞咗个期，否则死得更惨。」