【头条独家】 追求者注意 「绝世好女友」自爆唔锺意收兵 王浩信教追唐诗咏必杀技

王浩信和唐诗咏继两年前《不懂撒娇的女人》后，最近再在《解决师》中合演情侣，意外发现两人的默契更进一步，浩信踢爆诗咏成日不自觉发白日梦，仲自夸好了解拍档有本事将诗咏由太空拉回地球，这更是追诗咏的必杀技；而被喻为「绝世好女友」的诗咏亦承认，拣对象要好似浩信一样拉到她回地球好重要，至于勇敢向她表白的男仔亦会加分，她又讲到明自己唔锺意收兵，朋友同男友分得好清楚。浩信和诗咏仲合拍到约定将来在浩信自编自导自演的微电影中齐齐发放笑弹。撰文：杜淑霞 摄影：李维隆 发型：Sue Cheung(浩信)、Eve(诗咏) 化妆：Henry
Li(浩信)、Jessica Chan(诗咏)

浩信和诗咏都话知道再合作时既兴奋又期待，不过亦多了份忧虑，诗咏说：「我哋仲有咩可以做呢？上次大家有咗个好大嘅效果，入到观众个心，大家会有期待，今次仲要冇上次咁多拍拖嘅sweet嘢，都会有啲忧虑㗎！」不过，好彩诗咏对浩信有信心，「我知佢同我演戏方面谂法好似，唔使好似同某啲对手要袋定啲嘢做定准备，可以去到现场先决定。」

诗咏锺意发白日梦
诗咏去到现场想到角色「Miss Chan」最初因为教学方式唔同而唔锺意浩信演的「O Sir」，于是现实一样扮到唔锺意浩信，「我唔同佢倾偈唔睬佢，哈哈！但我以为自己有同佢讲，系最近做宣传讲番，先知自己冇讲到，我就发现自己有呢个好大嘅问题。」浩信补充：「佢好锺意发白日梦，发完又会以为发生咗，我都系做宣传先知系咁，我都估到对手脾性，同佢打招呼佢唔理，都估佢当我系『O Sir』，佢入咗戏我咪顺理成章照做罗！」诗咏更相信有啲对手应该已嬲了她，「相信自己有呢个问题应该好耐，会好多人以为我难合作，我成日谂到以为讲咗，之前同阿田（蕊妮）去旅行都系咁，所以我日常都系咁，将来另一半都要好明白先得，我成日发白日梦飘咗去第二个世界咁！（去咗外太空，要地球人拉番嚟？）唔一定地球人，太空人都得，大家一齐飘罗！哈哈！」浩信即认叻话：「我成日睇住佢升空，飘得好快，我会叫番佢返嚟！（得你叫到佢喎？）唔系咩叫拍档呀！」

浩信想自编自导自演
讲到剧中要主动追浩信，诗咏坦承现实未试过向男仔表白，有点不知所措，但现实她一定冇「Miss Chan」咁勇，「我好怕畀人拒绝，但会好欣赏勇敢表白嘅男仔，会加分，亦都唔锺意感情系估估吓，一系三个字，一系四个字，最怕嗰啲约足一年都唔讲，咁耐都唔敢开口即系唔系好锺意啫！我自己分得好清楚㗎！朋友就朋友，我唔锺意收兵，咁样对人唔系好公平！」浩信好奇问：「如果外国人嗰啲成日对住你讲ＩLove You呢？」诗咏竟然话：「所以我真系唔可以同外国人拍拖，我真系会好乱！」

既然两人咁合拍，下次合作玩咩呢？诗咏即兴奋抢答话想拍喜剧，点知开正浩信嗰瓣，「我锺意喜剧到自己写紧一个微电影，我锺意氹人笑同感动吓人。」听到浩信话自己执导埋，诗咏即自荐话：「拍戏个团队谂法一致好重要，佢肯定同我一致，仲识得拉我返嚟。」仲提议：「我哋两个可以做特工，但系成日甩甩漏漏，但又可以救到大家。」浩信即赞：「我哋一齐就度到嘢！」谈到颁奖礼，上次合作令诗咏首封视后，对于今次有冇信心再攞奖，诗咏话要睇埋《多功能老婆》先，又自夸会带旺拍档，但问到系咪睇好浩信再攞视帝，她尴尬话：「对唔住，我要投畀马明！」不过浩信冇怪佢，仲话要对自己有信心，但其他要睇彩数。