【头条独家】飙高音获郑裕玲赞好 56岁邓建明求教年青音乐才子

56岁的太极乐队主音兼结他手Joey Tang（邓建明）将于本月20日在Star Hall举行《Music Playground演唱会2019》，作为Rock star梗系Rock到尽，为咗增加持久力，唔会唱到变嗌歌，Joey喺开show前夕求教30岁年青音乐才子Nic Lau嚟改善唱歌技巧，学咗8堂，连有要求的郑裕玲(Do姐)都赞不绝口，喺商台节目《口水多过浪花》中叫他讲解吓点样将高音唱得咁好，Joey哥学有所成，开心到飞起！采访：方骞平 场地：星格流行音乐学院

距离开个人show愈来愈近，Joey Tang勤于练歌，仲搵来唱过《摇滚大侠奏》音乐会的Nic做导师，当日上堂正值练习Queen的《Bohemian Rhapsody》，Nic边弹琴边指导Joey飙高音小技巧，原来唔使拥有铁肺都能唱出惊人效果，Nic大赞呢个学生领悟力强：「佢好谦虚，其实系知道原理嘅，我只系提佢调整，将啲嘢放返大去做，佢好神奇，每次讲完消化一两分钟，就可以唱到，好劲。」Joey就赞Nic帮到手：「以前啲人觉得我系嗌歌，依家追求到音域。」

Joey希望唱功有进步
问到Joey纵横乐坛30年，搵个口靓仔教唱歌可会冇面？Joey笑说：「我个人不耻下问，唱咁耐都想进步，咪要搵人教罗，而且冇分年纪系达者为先，而且今次我拣咗好多，《小雨落在我的胸口》等有难度嘅歌，要唱得好。(有冇被批评到冇晒信心？)唔会，佢好nice，只会顾及我感受话『Joey哥，欢迎嚟研究吓！』其实我梗系嚟学嘢啦。」本月7日牛一的Joey当日做Do姐电台节目嘉宾，并为该节目创作及演绎的新Jingle(宣传声带)交功课：「我都好惊Do姐反应，好彩佢好开心，觉得唱法好高音好正，仲叫我喺节目度分享吓技巧，呢个真系我最大嘅生日礼物。」