【唔怕肉麻】男友冧称「My Boss」送祝福江嘉敏25岁生日狂放闪

2019-11-07 15:25

江嘉敏（Kaman）跟电竞公司高层男友Anthony拍拖以来，一直爱得甜蜜，虽然早前她被指「收兵」，瞒住男友跟其朋友兼生意拍档「Ｘ先生」王仁灏搞暧昧，但事后她已公开解释，因自己温柔细声招误会，男友不但冇怪Kaman，更道歉：「王先生系佢介绍我识，佢同我Say Sorry，搞到我都好内疚。」Anthony呢个男友确实难得。

前日11月4日是Kaman的25岁生日，身为绝世好男友的Anthony当然有做嘢。今日Kaman在IG贴了跟冯盈盈、刘佩玥及麦明诗等开生日派对相片，Kaman还激罕地tag了男友的IG，而Anthony的IG亦由private变成public，一睇里面见到大量他跟Kaman的甜蜜合照，仲着埋情侣装，又有揽晒腰嘅咀嘴相，真系闪到眼都盲。最难得Anthony唔怕肉麻，公开冧称女友做「my boss」送祝福：「Happy birthday to my boss, love you 8 to the sideway as always.」Kaman亦好识做秒速回应：「1st like.」

至于Kaman亦鬼马专登报细岁数称：「生日快乐to Me！又大咗少少喇！终于18岁半喇！一年比一年嘅生日开心！食嘅生日饭生日蛋糕都每一年递增！当然体重都系！睇住自己每年都有进步，的确想多谢身边嘅每一位好朋友！亦都好多谢屋企人同Fans一路默默嘅支持！我会继续努力，去学习去进步！今年就克服咗怕水，去学潜水！唔知嚟紧可以克服咩困难呢！」她感激一班好朋友为她举行的惊喜派对，直言吓了一跳，而生日愿望则是：「同细个嗰阵嘅一样，想世界和平！#宣布放弃减肥一个月」。