【过年咁样】好姊妹红衫贺寿 胡杏儿揽老公过40岁生日
2019-11-06 13:14 
今日系胡杏儿嘅40岁生日，寻晚佢个靓仔老公李乘德（Philip）已经帮老婆喺酒店搞咗个生日Party，老婆一班好姊妹「胡说八道会」嘅成员胡定欣、胡蓓蔚、黄智雯、姚子羚及李施嬅着到靓靓出席。从一众索女打扮可见，生日Party嘅Dress Code系红色，过年一样咁喜庆。
踏入四字头，寿星女好感触，「时间过得真系好快，眨吓眼就踏入4字头，真系好幸运好幸福，有一班好姊妹每年一定陪我过，有个锡我嘅老公加两个健康活泼可爱嘅BB，加上身体健康，感恩感恩，踏入4字，要更加努力做好自己各个身份，多谢家人支持和爱护，我会努力。」
而李施嬅就祝超级妈妈杏儿，「踏入新的人生阶段，更加大红大紫，更加美丽，再生多啲B’sssss。」黄智雯就咁讲，「踏入美丽的40，一定要跳番只Happy Dance，你系我心目中的role model，型格又得，优雅又得，做妈妈又得，有咩你唔得! 祝您愿望成真，继续散发自信自在从容的气度 ～love u forever 。」而胡定欣就祝杏儿20对生日快乐!「我成日都话你有一张好好的人生时间表，无论工作上或是家庭上，一切都来得刚刚好，转眼间你已经成为人妻还是两子之母，呢个20对系非常美满！接下来，不用急慢慢行，好好享受每步，大家一齐行！WE LOVE U。」
最好笑系杏儿老公，佢喺微博咁样讲，「老婆，欢迎你踏入四字头！40岁的成就， 18岁的样貌，真系正。」
最新回应