【头条独家】恩爱夫妇 视狗如命 Eric Kwok凑金菠萝「一家三口」家庭乐

音乐人郭伟亮(Eric Kwok)和叶佩雯(Grace)结婚8年，一直未有计划生小朋友，多年嚟两公婆keep住养狗仔，不知几happy。日前晚上，呢对狗奴夫妇拍拖去浅水湾dinner，都专登带埋一岁多嘅白色爹利犬「金菠萝」同行，仲迁就「阿女」坐露天餐厅。见恩爱夫妇食吓饮吓又倾吓，之后「Daddy」就独自拖金菠萝去散步，最后「两父女」开心折返，join返Grace「一家三口」温馨回家。 采访 : 李维隆、张咏森、李权威

因为激似荷李活影星罗拔唐尼(Robert Downey Jr.)，而有「港版Iron Man」之称嘅郭伟亮，同老婆叶佩雯由拍拖到结婚一齐19年，二人唔生小朋友主力凑狗，不过自去年白威(Westie)狗女Nana因病离世，二人连番饱受失去「仔女」之痛，伤心咗一段日子，今年初二人心痒痒，喺社交网志喜迎家庭新成员，Eric以英文留言：「在过去的14年，我们养过三只狗，Ah Jun、Toro和Nana。那些年已经过去，现在新的时代开始了。这个小家伙的名字是菠萝，全名金菠萝！」回复「开心凑女」嘅日子。

日前晚上7时，Eric两公婆揸车去浅水湾放狗仔。二人拣选在一间露天餐厅坐低，方便照顾「囡囡」。见二人点了冻柠茶、冻咖啡及几款食物，边食边讲，有说不完嘅话题。只见面圆身肿幸福肥嘅郭太穿上长袖衫，愈坐愈热，要出动私伙风扇仔放枱上「自私吹」降降温。其间Grace又不时睇手机，再与老公开心share。

Hea足大半小时，人夫开始每日嘅指定动作放狗散步嘞！见佢独自拖住囡囡去散步，当见到其他爱心狗主时会轻松微笑大谈狗仔经。见到金菠萝同其他狗仔追逐嬉戏，Eric笑得特别甜。15分钟过后，Eric睇睇表怕闷亲老婆，即带囡囡折返餐厅，一家人再行去取车返家。

另一日下午同一个地点，又见到Eric和老婆带金菠萝去街街，呢日就多咗Eric嘅男友人，以及其两只爱犬。三人喺餐厅叹冷气食tea，逗留近一小时，两男首先拖狗步出，男友人托Eric帮手凑爱犬，然后如厕。其后，Grace埋单出门就负责睇实金菠萝。等埋男友人接番狗仔，Eric夫妇就拖住爱犬行去取车走人。