容祖儿放假前夕卖大包 农夫搞笑Chilam接力上台爆同居关系

容祖儿红馆个唱踏入第14晚，她先跟细佬容逸恒于红磡360上对唱，嘉宾更是打孖上，请来农夫及张智霖助阵。
农夫上台大展搞笑本领似小型栋笃笑，一开始就玩大踢爆，说：「其实扮咩惊喜，大家一早知我哋系今晚嘉宾啦，好多人收到whatsapp嘉宾list，你哋都知啦，下场系草蜢！」C君：「我收到，18号农夫，我睇到几嬲！」祖儿话：「我一早就已决定请你哋做嘉宾㗎啦！我觉得你两个好OK㗎！两个天生一对，一个咁高，一个冇咁高。一个长期唔够饭，呢个食埋佢个碗饭。」陆永：「搵我哋咁样先够crazy系咪？你之前全部巨星，原来容祖儿你真系黐线㗎！」C君：「我作为你嘉宾，要同全场观众负责，好想讲一声 ：『对唔住，好抱歉』，你谂下，大家之前睇个啲张学友、刘德华、古天乐，跟住今晚系农夫！你话点算呢真系！」
祖儿就叫农夫听下观众的反应，观众纷纷狂欢呼撑农夫，但两只死仔就笑道：「今时今日闹同赞啲声系差唔多…」；C君续谓：「我抱歉自把自为应承祖儿做嘉宾，我哋应承大家多一件事，今晚我哋唔再唱任何歌，唔再折磨你哋听觉，请放心。」然后两人一同抵死唱《刻不容缓》，说：「我『无自信，人云亦云』，所以我哋两个咪系娱乐圈到『庸庸碌碌半生』。」观众报以热烈掌声。C君再讲：「如果在座任何朋友想退飞，唔需要唔好意思，我自己都退咗，我睇到今晚嘉宾农夫，我帮你哋谂埋，你点面对睇之前个啲嘉宾啲观众，你谂下一齐食饭，你朋友问，你嗰晚边个嘉宾？人哋话张学友，你话农夫，几难听，两个垃圾。」
祖儿就直头笑到收不到声，不懂回应，只好说：「你哋唔好咁样话自己，千错万错，系我错。」 陆永：「你哋唔好怪Joey，佢系我认识最锡歌迷嘅歌手，佢锡嘅程度系非常crazy，crazy到自己假期都唔要，补番场畀你哋！咁锡你歌迷，咁今晚系咪要补？咁嘅嘉宾，嘉宾衰成咁硬系要补啦！」又引得观众哈哈大笑之馀更热烈起哄欢呼！
C君：「大家知道，容祖儿pretty crazy演唱会，其中最crazy就系尽量希望唱多啲歌畀大家，真系pretty超时！有数得计，每晚大概罚5万，做完场骚，最少都罚100万。哗！系我就唔唱啦！我最想试下8点半开骚，我8点9散场，测试下红馆over要补水，咁under有冇得回水？」

陆永：「容祖儿你点解咁对歌迷，你简直系荼毒香港乐坛，你开演唱会开成咁，咁大制作，叫人哋以后点开演唱会？睇过呢个骚，重点睇其他骚？ 」然后反问观众：「所以好多人都话最好睇演唱会系边个？」观众狂叫 :「容祖儿！」农夫就叫观众齐齐「举高只手」，大合唱《举高只手》作结。

农夫离开后，祖儿就好开心同观众讲：「我想话畀大家听，我好努力做咗14场，听日我放假。今日阿姐好高兴，决定卖大包，演唱会每晚我都会唱人哋歌，满足自己欲望，今晚准备咗一首我好喜欢的歌畀大家，希望大家会锺意呢首歌，然后祖儿唱出《祝君好》。在观众没有心理准备下，张智霖（Chilam）突然升上台同祖儿合唱，无端端又多个靓仔嘉宾睇，观众开心到飞起，疯狂大叫，祖儿就话：「今日想请大家食多粒糖，唔系我想请就得，要请得郁先得，大家畀多啲掌声多谢张智霖！」
两人在台上更披露不可告人的秘密，Chilam话：「我哋两个关系，正所谓远亲不如近邻！」祖儿：「今日披露大家知一个秘密！你哋唔好同人讲，我哋系同居关系！哈哈！不过，同居，不同层！我哋住同一大厦，见得佢最多系停车场同电梯，同舞台真系第一次！好多谢Chilam，佢拍紧贺岁片，请几个钟假嚟支持我，重携眷出席，老婆靓靓（袁咏仪）都嚟埋睇骚！真系多谢佢一家。」
Chilam话：「我有个小秘密想话你知，我个仔撞到你几次，佢好怕丑，你出咗电梯，佢就问我：『Who is she?」我答佢：『She is a diva！』，香港天后，i’m proud of you！系缘份令我哋friend咗咁多。」祖儿见观众咁兴奋，就拉住Chilam唱多首歌：「大家咁多开心，我带个靓仔一齐同你哋握下手，再唱下歌啦。」然后两人同观众一同合唱《岁月如歌》，气氛热闹。