阿碌开咪｜家有家规着有着法

间中有朋友约去不同会所午晚餐，通常我都会先问问——有冇Dress Code，免尴尬。

因为试过几次，难为了主人家。

第一次，马会董事请到沙田睇跑马。我懵盛盛，未去过，以为老西一度已掂，冇打呔。

结果一坐低，经理已埋耳边细细声讲：「曾先生，公司有电话搵你，请到外边听听！」

吓？首先，边个会知我在马场？第二，咁样搵法，肯定严重到死人冧楼先会噃，真系吓到弹起！

当然，同枱其他宾客，也以好奇眼光睥住，唯独主人家微微笑，似乎唔多着紧。

结果一步出餐厅，经理已莲子蓉咁面口，递上六条旧领带，又系细细声：「曾先生，唔好意思，大董房规矩，宾客要打呔㗎，请你选一条。」

老老套套都冇法嘞，求求其其索一条啦。

又有一次，去山光道马会会所酒吧Happy Hour，坐低，再中！经理笑笑口，攞对皮鞋埋嚟：「曾先生，呢处规矩唔可以着波鞋。呢对皮鞋一定Fit你，介唔介意穿上呢？」

一睇，肯定系人都Fit啦，成只龙船咁大，乜野Size脚队入去都肯定可以！好，又着，唔通起身松人咁冇卡士咩？过瘾，对鞋乃欧洲名牌货，着得非常舒服，几乎唔想除，着埋走人（讲笑咋）！

前日下午，某位老友又请去香港会Garden Lounge午餐。小弟早早知道，此处规矩多多，例如唔准写野、唔准听电话。衣着方面，唔准波鞋、牛仔裤及冇领衫。

好好好，加有家规，着有着法，来得就要尊重人哋游戏规则。

不过，今次踏入，又中招！一位白色礼服经理闪身埋来，细细声在我耳边讲：「曾先生，唔介意嘅话，请将恤衫脚揳返入条裤之内！」

哦……本来想驳佢话：「经理，呢件唔系纯恤衫，也可以当外套着。今次小弟着法，内有圆领T恤，故此，外边呢件系薄褛嚟㗎！」

不过，今次真系「话到口中留全句」，无谓难为主人家。大丈夫，揳就揳啦！

曾智华

 

阿碌开咪