阿碌开咪｜艺人讲嘢毋须认真

前晚老友饭聚，其中有位拉我问：「喂，碌Sir，阿叻话佢主持完无记新节目《答得快好世界》后，就告别演艺工作喎，你估系咪真？」

「骑骑，呢段消息来自娱乐版喎。正如前电视台宣传高手黎文卓名言：娱乐新闻乃著名当铺——信义盛（信二成）。更何况来自最喜欢搞笑的阿叻口？佢唔咁讲，乜有得见报呀？」

之后，睇清楚段新闻点写。果然，阿叻在访问末段立即兜底：「若将来有人搵我，都可能亮相做嘉宾嘅。未来职业，可能会唱歌，到时话唔定返转头拯救乐坛㗎！」

阿叻老练到爆，面对「未戒奶」记者仔，真系可以当对方泥公仔咁玩，先搓圆，再揿扁！

艺人讲嘢，不必太认真对待，不单止系阿叻，其他天王巨星也一样。尤其扬言话「退休」的，真系十之八九都稍后搵个藉口「复出」。复出完一次，即变以后都「复出」了。

最多鲜明例子为上世纪八十年代尾，中英为香港前途谈判，香港人移民，立即成为潮流。咁处身潮流最前綫的明星唔走，咪变好落后？于是纷纷加入「移民潮」，个个扬言封咪退休，到加拿大过「宁静新生活」。

后来，再加上谭咏麟一九八七年宣布不再攞奖，暗示：「我唔玩嘞，哈哈，你哋玩埋佢啦！」

此一突然公布，刺激不少歌星也「唔攞奖」，以免被揶揄「阿伦唔攞我先有奖」的尴尬情况。

唔攞奖潮后，跟住出现就是封咪潮。你封我又封，突然成巨星「身分象徵」。不过，个个精甩辫，封之前先到红馆「执会」，以封咪名义，一做几十场，个别更喊晒话「告别舞台」。

岂料……你知我知大家知，短则一两年，长则三五年，全部复出，不再封咪了。

纷纷复出后，有位电台主持义正词严在节目话：「用封咪来谷演唱会门票，大收特收，三年之后即复出，咁个封咪演唱会咪有欺骗消费者之嫌？可以去消委会投诉喎！」

结果主持惨被巨星粉丝骂个狗血淋头，公理何在呢？

曾智华

 

阿碌开咪