阿碌开咪｜银行快快回「善款水」

回水、回水、回「善款水」！

上周日中午，我隐隐听见十万计焦急、愤怒、不安、狂躁、火爆……声音在嘶叫。

发生乜事？若你是马迷，一定唔会问啦，因你必也是正在大叫、「狂呼我XX、XX」其中之一。

以股票做例。我买中电、港灯股票，因作为香港人，引以为傲。无他，以前住过的所有城市，无论号称点先进，皆会久不久停电，搞到倒泻箩蟹。做食肆的，更鸡毛鸭血，食客点会摸黑冇冷气继续食吖？肯定MM声之后鸟兽散。

香港的中电及港灯，令人骄傲，因绝少甚至近年未见过发生停电。给人专业、安全又安心感觉，绝对值得支持。表示欣赏最佳方法，成为佢哋股东！

讲返上周日发生乜事，正是两家主要银行，包括滙丰及恒生，同时间网络冧档，搞到客人乜都做唔到，当然火喷喷。

更猛火为「忠贞善长马迷」，数以十万计，大部分皆习惯开赛前，用手机转钱入投注户口，以便搏杀（十之七八变善款）。点知从来未试过发生的「灾祸」，突然降临，正是手机显示，银行网络发生问题，无法转钱。

大件事，即系睇住就快开跑而无得投注！嗰种超级冇瘾法，只有马迷才深深理解，对其他人，讲多无谓，屣口水。

咁点？小弟就是最佳人办，立即飞奔/车去附近投注站，真金白银入钱落户口，以维持每场有得玩。人同此心，结果去到投注站，哗，N年冇见咁夸张，人人揸住叠现金，口中念念有词，个个似在叫：「快啲快啲快啲！XYZ！」

最惨情有群「无奈人」，因未打齐三针，唔准进入，站在门口欲哭无泪咁款，垂头丧气似……

两家涉事银行，呢铺冧档真羞家，唔该公开宣布点补镬，以息众怒！

睇睇今晚，韦达配合希威森复出大开杀戒，「八心之威」、「量化欢腾」及「赢尽天下」全部跑强项兼磨到极锋利，只只坐P望W，一于买过关！执笔时未知「对衡之星」能否补出，若能，一定要买呀，知冇？

曾智华

 

阿碌开咪