阿碌开咪｜「处男」检测

疫情严峻，风声鹤唳，社交生活全面冚旗，不过，工作仍然要继续。

正在筹备一个电视节目，快将出世，自然要频频开制作会议。由总监到监制到导演到资料搜集，坐埋起码六至八个，点搞？

当然，第一，人人戴口罩。第二……我拍档「肥M」最特别，因开会之前，未出家门，老婆大人已有「铁的指令」，必须遵守，否则……最大惩罚——唔准见孙仔。大家睇政府宣传都知，今一代长者几鬼着紧——我要见孙仔！本来唔打疫苗都速速去打。

肥M老婆大人指示：一、口罩要长戴，只限饮水时除低！二、参加会议者，个个都要戴口罩！三、所有与会者，开会前必须先做快速病毒测试。四、回家入门前，肥M要再自做一次病毒测试才准入门。

哗哗，好严谨啫，小弟开咗几十年会，都未试过有咁要求。

不过，鬼叫你求肥M上阵咩，于是由总监到……资料搜集，个个「笃鼻」可也。

肥M也照顾周到，正是怕你哋话冇检测用品，早托医生女婿大手由欧洲比利时入货，保证优质，声明93%准确。

就此小弟的「处男检测」，就这样开始了。未做过，有啲担心，因用支咁鬼长棉花棒「队」入鼻，会唔会好痛㗎？又会唔会好痕，搞到要猛打喷嚏㗎？一轮担心之下，都系萧总监犀利：「大家唔使怕，等我示范！」哗，恍似熟手技工，「队」完左边「队」右边。然后将棉花棒浸入小小药水瓶，搅几搅，再将药水倒在化验器上，等「开啊」，睇睇出乜。

咁好玩，照做可也。「队」呀「队」，咦，冇乜唔舒服噃。跟手搅药水，再倒落化验器。

哎吔吔，此时，个心突然震一震，十五十六，因……怕……若果出现两条綫咪死？即系会议要立即告终。然后，返家报衞生署，再先自我隔离，等入营……一边「胡思乱想」，一边望住个检测器开乜。终于——一条綫！「处男检测」过关，哗，一天光晒！

曾智华

阿碌开咪