【阿碌开咪】「牛肉乾」几时派

早早早早，小弟已在此敬告/警告大家，今个财政年度，政府必定大开「牛肉乾杀戒」。无他，疫情下使咁多钱，边处搵返？N种方法，其中最易，派「牛肉乾」！经济学ABC，香港车位，百分之一千供求失衡，汽车发牌数量与合法车位数量比例，相差极远。即系话每日都有数十万辆车非法乱泊，即系有数十万个机会畀政府赚四百元！车辆发牌数量由政府定，合法车位数目，也由政府操控，即龙门任搬，问你班车主及司机死未？

早前财爷已在《预算案》中公布，「估计」来自检控违例停泊方面的罚款收入大幅飙升。咁即系点？即系会抄抄抄，狂抄！根本唔使「盲公陈」占卜都知。

果然，之后警察及交通督导员日日做嘢！

以前，好多人觉得派牛肉乾有不成文规定，例如过时过节唔派；入夜后唔阻街唔派；在「警民关系」良好的区域Double Park唔派；「自己友」居住或工作地头唔派；打风落雨唔派；早餐时分唔派……以上「规定」系真唔系真？

曾几何时，绝对真！相信大部分车主都心照，并且掌握几时泊、泊边处会属高危，又或相反，故可放心非法乱泊。

本周一，呢呢，我就几乎中招嘞！当日三号风球，横风横雨，刚刚约咗朋友在尖沙嘴宝勒巷晚饭。众所周知，宝勒巷乃龙蛇混杂之地，通常呢类区域，「警民」都有充分默契，你代客泊车，搵啖食，我不会无情情赶尽杀绝。相对地，呢个你地头，一定要将秩序维持得「好好睇睇」！

正因三号风球加上述「误解」，再加埋三十七元一小时停车场全部爆满，我刚见路边有车驶离，立即倒车入。哗，舒服晒，大安旨意晚饭。

岂料晚上十点半落街取车，竟见前面红蓝灯闪闪，大件事！果然，一队警察在抄抄抄。
吓？如此恶劣打风天气，如此传统「江湖地段」，如此深夜时分派「牛肉乾」？哗，真系要讲句「今时唔同往日」嘞！

曾智华

阿碌开咪