BB还未出世 大肚港妈豪花6万买英文教材：移民唔识英文就头痕

我嘅一位香港朋友准备做妈咪，上个月用六万蚊买咗一套英文教材。

我笑佢：「BB仲喺肚里面喎！」点知朋友轻描淡写道：「唔早㗎啦，好多人用埋嚟胎教，仲直接买多元智能套装。可惜我唔够budget，唯有买住基本版先。」

六万蚊，絶对唔系一个小数目。喺父母眼中，呢种「非常」早已成为「正常」。借用朋友嘅话：「呢啲钱唔悭得，将来如果移民，唔识英文就头痕。」根据中大香港亚太研究所最近发布嘅资料，42%受访港人打算移民。大势所趋，我嘅朋友亦难抵洪流。

好多父母都想仔女英文嘞嘞声，用咗好多时间、精力、当然仲有金钱，都成效甚微。到底点先可以事半功倍，将学英文变成一件自然好玩嘅事？

「一人一语」（one person, one language）最有效

我嘅美国朋友Giancarlo Di Mizio，佢嘅一对仔女精通三种语言：英文、意大利文、西班牙文。从事语言教育及研究十几年，就职Indy Language Center教育总监，佢认为要培养多语言儿童，最有效嘅方法系「一人一语」（one person, one language），而昂贵教材只系其次。

「一人一语」系指，与小朋友日常接触嘅人，只讲各自擅长嘅一种语言。对Giancarlo嘅仔女而言，妈妈讲英文、爸爸讲意大利文、保姆讲西班牙文。有啲父母担心，呢个做法会造成语言混淆，最后搞到两头唔到岸。

Giancarlo认为，只要大人贯彻始终，坚持只讲一种语言，小朋友会学识根据谈话对象转换语言。多语言环境中成长嘅小朋友，都可以「自动转台」轻松无难度。

切忌唔咸唔淡「中英夹杂」

「一人一语」系个好方法，不过并非所有父母都擅长英文。Giancarlo话，如果你英文半桶水，不妨搵他人代劳，千其唔好中英夹杂。例如「呢个apple好red」，喺同一句话里面不断「转台」，只会搞到仔女头都晕。打乱语言学习，阻碍佢对不同语言嘅判断。

我有位香港朋友，佢嘅工人姐姐无论煮饭定做家务，都完全无天分。但系朋友好满意，而且续约再续约。我不解，朋友一语道破：「呢个姐姐英文好得，阿女英文咁好全靠佢。」

语言源于生活，朋友明白呢个道理。自知英文麻麻嘅佢，选择搵外援，将英文融入阿女嘅生活。呢位工人姐姐洗杉煮饭唔在行，佢嘅selling point系一口高水准嘅英文。朋友如获至宝，各取所需。

如果你英文好好，家中又有菲佣，不妨沿用「一人一语」原则，俾仔女学埋菲律宾文。我嘅一位朋友，当年屋企菲佣识英文，但系父母要求菲佣只讲菲律宾文（Tagalog）。久而久之，朋友对菲律宾文就驾轻就熟。佢话：「啲亲戚仲笑我阿爸阿妈，唔明仲咩学啲偏门嘢。」

40年后嘅今日，朋友佩服佢父母嘅远见。佢硕士毕业后，加入一间行内数一数二嘅VC创投公司。因为识菲律宾文，公司安排佢飞过去半年，实地考察并研究菲律宾农业投资市场。呢个经历，成为佢喺创投界大掌拳脚嘅踏脚石，至今平步青云。

移美港妈Vikey Chen与女儿

善用「情感策略」同「感官刺激」开心学英文

Giancarlo 系YouTube「香港Vikey移民美国」一连4集讲「学英文嘅各种窍门」，佢觉得语言学习讲求方法：「与其用六万蚊买教材，不如攞去同一班讲英文嘅朋友吃喝玩乐！」佢好认真咁讲：「社交实际上系运用情感策略，融合感官刺激。既轻松自然，又事半功倍。」

当你心情好，系咪一切都充满希望，甚至觉得无所不能？Giancarlo话，积极嘅情绪会将你嘅学习潜能发挥到极致。而吃喝玩乐带来嘅感官刺激，有助记忆新语言。佢仲话，脑神经嘅发展将持续一生，大脑充满可塑性。新嘅生活体验及人际交往，都会帮助脑神经形成新回路。

所以，当你同讲英文嘅朋友，一齐做有趣嘅事，进行大量有背景有意义嘅对话，大脑会将英文内化。加以时日，你自然可以直接用英文思考同表达。

我嘅一位朋友锺情法国文化，因为喺大学工作，几年来识到不少法国交流生。疫情前，佢一家人几乎每个周末，都带啲法国学生捐窿捐罅周游香港。5岁嘅阿仔虽然无上过法文班，但已经可以同法国友人沟通无阻。朋友嘅无心插柳，正系「吃喝玩乐」情感学习法嘅完美诠释。

Giancarlo Di Mizio与他的子女

掌握窍门，万变不离其宗

不过，如果识唔到外国朋友，可以点帮仔女学英文？

Giancarlo话，如果父母已经买咗教材，其实都可以好好利用。例如，父母不妨引导仔女，将钟意嘅英文故事改编。呢个再创作嘅过程，可以刺激好奇心同创意，比单纯记忆故事内容更有效。或者，选取教材中好听嘅英文歌，同仔女一齐加入舞蹈元素。边唱边跳，开心之馀又刺激感官。

你就算唔买教材，网络都有好多免费资源。只要你明白「积极情绪」同「感官刺激」嘅重要，就可以自创适合仔女嘅方法。掌握窍门，万变不离其宗。

如今「移民潮」持续，父母不惜揼本帮仔女学英文。如果唔想洗冤枉钱，就切勿心急乱投医。无论你想仔女搵份好工，定系计划移民，抑或想下一代睇得明「美国独立宣言」嘅天赋人权同自由平等，学英文都要记得理性消费。

撰文：移美港妈Vikey Chen

文章获「香港Vikey移民美国」授权转载。