李辰安 - 印度返工戴头盔？｜辰来之笔

印度Office高风险 唔知点算？

印度打工仔要戴头盔先至够胆返工。

印度政府Office日久失修，成日跌天花。

印度打工仔戴头盔返写字楼工，真系算领先全球。

印度Office成日跌天花，打工仔有危险。

印度政府Office日久失修，成日跌天花。

我忽然感觉自己好幸福，老板对我同一班同事太好了，要是我在印度打工，我真系唔知点算？

大师兄首先讲：「安仔，有乜点算，你去印度移民咩？」佢一早坐咗喺大堂正中央嗰张枱。「我真系唔会搵命博，我又唔猫。」茶楼老板一个箭步走过嚟，想同大家约个时间游广州。「好方便咋，依家去天河食饭，话咁快就到，搭广州东站好方便。」张翁此时赶到，听见广州成个生晒︰「系啦，以前去广州搭柴油火车，成半日都未到。现在个零钟就直达中心，好似发梦一样。」

「系嘞，世侄，你讲乜嘢唔似猫唔似狗，系咪想食鱼翅饺，叫老板帮你Order。」老板话，慢慢嚟，唔使急，饮杯茶先啦。「老板，我其实想食粉果，不过，鱼翅包都可以，我唔系又猫又狗。」大师兄一句「九唔搭八」就走过场。银行伟问我几时去印度？「不如叫个蒸排骨，老板话必食。」大家饮茶，今日老板精选系十五年普洱茶头，好特别，饮落好似无乜味，不过，又有一啲樟木之类味，老板上个礼拜去深圳探茶叶铺嘅潮州佬，带咗几斤返来，慷慨同大家分享。

大家坐定定，想搵个有趣话题，银行伟就话三年疫情搞垮好多行业，其中曾经暴发几千亿美元市值之共享空间企业，听讲就快执笠。「一场游戏一场梦，疫前个个唱好，香港都为此主题投资发癫，不过，依家好多大公司已经学识Work from home。」大师兄话︰「佢表妹个女，本来要往返香港仔同中环公司上班，疫情齐齐Work form home，Work下Work下，大家要Work，使乜返公司，网上办公就得啦，于是疫情之后，大家留在家中。」哗，呢间系跨国大集团呢㗎，咁缩骨都得嘅，香港啲Office仲使租得出。

张翁话︰「做生意讲成本效益，应使得使，应悭则悭，你知香港租金有几贵，可以Work from home，以后唔使成日返Office，老板Happy，夥计又开心。」系，你知返Office有好高风险。「安仔，你又九唔搭八，呢度系香港，唔系敍利亚，或者乌克兰，有几危险，唔通你惊中暑。」鱼翅包又即系鱼翅饺，原来无分别。「我讲，上班好危险系指印度。」

成日跌天花 打工仔戴头盔返工

老板介绍大家食咖喱牛肉炒底，「李先生一定锺意啦。」唔关我事，我其实话，印度打工仔要戴头盔先至够胆返工。「你无睇新闻咩，印度政府Office日久失修，成日跌天花，员工向上司申诉无果，为咗份工，只好自己想办法啦，戴头盔返写字楼工，真系算领先全球。」

即系咁，我又唔系猫，无九条命咁多，所以庆幸唔系去印度返工，同时觉得我老板好伟大，起码租一间四四正正Office畀大家开工，我唔戴头盔都可以安心工作。「安仔，现在中环、湾仔、旺角、油麻地周围好多旧楼都有老化问题，石屎随时剥落，你最好出街戴头盔啦。」讲呢啲，好啦，老板推介之咖喱牛肉几好，不过，椰油味略重，唔多够劲。「安仔，热气呀，食到咁辣，你几十岁，注意调理身体。」好，饮多杯陈年普洱，通通血管先。

老板话，广州有政策，加快旧区重建，香港咁多旧区，都可以谂下积极改善环境，旧区重建腾出嘅单位优惠后生仔，吸引外来人才，一举几得。「世侄，饮茶啦，讲呢啲。」银行伟近日个样好愁，可能与楼市同股市唔多顺有关，都系换过话题，几时去西九搭高铁上广州？周围去搵美食，几开心呀！

 

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ