李辰安 - 楼市股市齐飞｜辰来之笔
2023-08-01 00:00 
内地楼生晒 好日子返嚟？
赶去黄昏酒聚，中环近日气氛很好，内房拉动股市，个个都话好日子返嚟，我要搵银行伟倾下。
一入到去，见到大师兄揸住张楼盘传单，入晒神咁望下望下，我侧身走过去瞄一瞄，原来唔系香港楼，又唔系加拿大、英国盘，原来系中山豪宅，我问︰「终于返大湾区买楼嗱，有免费睇楼团，不如报名，我哋四个柴娃娃去参观考察。」张翁话，唔系好惯跟团，如果有兴趣，不如约车直接北上，个几钟头去到珠海、中山，睇完可以再上去顺德、佛山，「然后，以广州为终点站，食完晚饭住一晚，第二日去广州南站搭高铁返香港，ＯＫ啦。」
银行伟话，最高层话要调整楼市政策，内地楼即时生晒。「辰哥，如果去投资买楼，最好吼佛山、广州，因为两个城市会纳入城中村改造，大把世界。」一时之间，唔知佢讲乜，既然人齐，大家饮杯威士忌加冰，定定神。「系啦，依家股市同楼市好似食咗回春丹，下半年，抓紧机会，想穷都难。」咦，听你咁讲，等阵要问你多啲投资问题，我都想去大湾区拣个笋盘。
「世侄，早排都叫大家去睇下楼盘，趁低吸纳，点知你就得个讲字，依家好消息出咗嚟，相信价位会升。」大师兄话，行过街口，有人派中山楼盘单张，所以好奇攞张研究下，百几万一层，有埋装修都几抵。「银行伟，有乜意见？」
威士忌加冰最啱慢慢倾，四个人坐埋一枱，好似开会咁认真。
银行伟介绍城中村概念︰「其实你当香港旧区重建咁上下就得啦，即系咁，将大城市一啲老区收购再重建成新村，如是者，可以搞活个楼市之馀，又会造就一批迁拆户有靓屋住，如果补偿得好，就会制造一批高消费人士，大家眉开眼笑，内需问题可望解决。」原来系咁，听落好似读中学西史科，美国罗斯福新政咁，借新建设提高就业，同时刺激经济。
有钱无嘢做好辛苦
「安仔，仲有系改善城中旧区居民之生活水平，一举几得。」所以话，广州、佛山因为系中央点名搞城中村改造，嗰度一定好旺市。「之不过，中山都唔差，明年有中深通道，中山市中心系新枢纽。」系罗，我上网睇视频，有位中山经纪咁话，深圳楼几万蚊一平（平方米），中山楼几千蚊咋，快啲过嚟睇下啦。
银行伟话，广州南站都会有大型开发，到时又会有一个超级商业城，唔使十年八年，又系一片黄金地。「好啦，大家不如赶快饮埋呢杯去食饭，再深入研究。」饮酒唔好急，不如谂下有乜好嘢食先。「大家都听过广州有条猎德村，系全国城中村改造之经典，条村经改造之后，卖地有巨大收益，于是传说中有村民成亿身家，唔使做。」
我都听过，广州人有钱到揸劳斯莱斯返工。「仲返工？」系，有钱无嘢做好辛苦，于是有啲阿叔、阿姨做保安，咁先平衡到个人生活。「世侄，我都有朋友住广州，边有咁浪漫夸张，有人有过亿补偿唔出奇，个个都系亿万富豪，你估系拍电视剧咩，村民生活改善一定系，但唔好太多幻想。」
谂下谂下，香港几时又跟风搞城中村改造？听讲旺角、油麻地有好多卖唔去之几十年旧楼，如果趁低吸纳，等特区政府拆迁补偿，岂不是赚到笑？「安仔，你都九唔搭八，香港旧区重建要几十年，到时你个孙都未有得安置啦。」明白，饮完酒，去食潮州菜。
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应