李辰安 - 热到爆热到喊｜辰来之笔

香港开埠百多年，又有第一次，我有幸亲身见证，哗，真系热到唔讲得笑，唔知你又点睇呢？
 

天气酷热，市民应提高警惕，多补充水分及做足防暑措施。

夏日天气酷热，大家应提防中暑。

市民自备小风扇降温消暑。

紫外綫高企，可带遮防晒。

烈日当空，小孩子嬉水降温。

紫外綫高企，可带遮防晒。

炎炎夏日，大家都到泳池进行下水礼。

烈日当空，小孩子嬉水降温。

以毛巾遮挡炎阳降温。

以手遮挡炎阳降温。

上街头晕晕、眼花花

我今日头晕晕、眼花花，行过去一条街距离之小酒馆，好似大空人登月漫步，浮下浮下，似幻疑真，好啦，到达啦。大师兄一身清凉打扮，如果可以嘅话，佢可能要着短裤，再加对人字拖。「安仔，你就系咁九唔搭八，我打公家工，大部分时间坐Office，返工要执到正，如果我有朝一日调咗去户外体力劳动岗位，就可以着背心开工。」

香港有史以来在6月之前发出第一个极端酷热天气警告，当时系正午12点半，我在中环街上，想早少少去银行，殊不知，好多人都偷鸡，午饭前就入嚟排队，望过去好似要排45分钟，不知如何是好。「世侄，银行有冷气，你出去盏搞啦，后生细仔就无所谓，顶得顺，你就唔好乱嚟。」张翁，我去银行都系搞啲重要但非紧急之项目，人多就唔好嘥时间。银行伟问我，乜无网上银行服务咩？系呀，我几十岁啦，边似你哋咁前衞。

饮啤酒的确好消暑，但系饮完之后，成身爽晒嘅时候，就好想瞓觉，你知日日都摄氏三十几度，个人特别累。「咁你不如坐的士返屋企啦，你个样都好似唔够瞓呀。」其实都系，因为房冷气好似日久失修，唔够凉，搞到半夜眼光光。
 

香港精神 几艰难都捱得过
 

「世侄，上世纪六十年代我最记得嗰年又热又无水，成条街都系人，排长龙等攞水。」不过，好彩张翁系大富之家，当年搵人开个科学井，于是大致解决难题，唔系就要出街排队，少爷都咁话。「原来市区地下都有水源，我仲以为乡下先至有。」大师兄，你有所不知，当年市区边有咁稠密，依家周围都系石屎建筑，你就想可以开采钻探地下水。

「当年开科学井好热闹，就好似发现石油咁高兴，打个井起码要七、八万元，可以买到太子道中产住宅，你估好简单？」唉，香港几艰难都捱得过，制完水又有大风灾，呢啲咪叫做香港精神罗。

银行伟想当年，跟老板去澳门洽商大生意。「氹仔有家亚洲至豪嘅酒店，想融资强化经营，于是一齐去酒店开会，嗰家酒店有一个好大嘅泳池，侧边有个水中酒吧，大热天时，你一边游，一边去酒吧Order杯冰冻啤酒，真系有如人间天堂。」之不过，伟哥当年得个睇字，老板日理万机，即日坐喷射船返中环。「仲未讲完，返到中环，我要上Office做计画书大纲，结果夜晚九点几至有得走。」

伟哥，老板有心栽培你呀。香港地，梗系以效率为先，唔系边可以创造出上世纪八、九十年代之黄金时代。「老实讲，嗰单生意无乜料到啫，不过老板就见到有我呢个助理，于是明知唔多会成事，都要我即刻整好份嘢。」嗰家酒店我都有印象，不过已经成为集体记忆，又或者系文化遗产，今时今日澳门多咗好多超级豪华酒店，夸张到你唔信。

「讲开澳门，几时又去？」我兴趣唔大，想当年，氹仔系小镇风光，人又少，澳门人行路都慢过人，未去到酒店都已经好Relax，依家再无呢种Feel，澳门同香港有乜分别？大家都系周围人山人海，食嘢要排队，去酒店Book餐厅要网上预订，一头半个月都无位，我就宁愿一动不如一静。「世侄，成个大湾区都咁多人，你不如去青海省修行啦。」呢个都系好提议，有得谂，不过依家饮多杯先，食完饭快啲返屋企休息。

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ