李辰安 - 旅日大熊猫 约满返乡下｜辰来之笔
2023-02-28 00:00 
约满回国 日人挥泪送别
日本大熊猫约满回国，当地人有情有义有眼泪送行，我想知，国家以后是否再会行熊猫外交呢？
我好幸运，细细个跟屋企返广州，就到过动物园与国宝见面，不过，当时我唔系好领情，印象中大熊猫并非黑白色。「安仔，你唔好又喺度噏三噏四，坐定定饮杯茶先啦。」还好，无畀人闹我九唔搭八，咁就真系要坐低饮杯茶食个包先。今天有少少闷热，唔想饮普洱，不如叫壶寿眉清清地。
「大师兄，我好记得当时大熊猫系成日碌地沙，成身泥黄色，当年无乜嘢玻璃房咁进步，大家同国宝可以直接面对面，无阻无隔。」想当年，我好百厌，去到动物园周围走，成家人想同大熊猫影相，我就行去隔篱想搵老虎，于是畀阿爸阿妈「醒」咗一番，我仲记得。
「日本人唔知系咪咁长情，搞到好似做电视剧大结局咁感人，之不过，日本人一向都好有礼貌，我哋要学下人。」银行伟，你真系九唔搭八，我哋中国人学日本人乜嘢好呢？依家连广东歌都自己创作啦，你以为家阵系五轮真弓、泽田研二时代？当然，我唔会讲出口，只不过想话佢知，今时今日，日本车都卖输畀国产车啦，因为国产电动车已经后来居上，日本好难再保持汽车制造大国地位，迟多十年八载，日本成街汽车都系中国制造。
「辰哥，日本车的确唔够国货竞争力，因为国产车大力开发非洲市场，呢一个先至系大市场，加埋中国内地需求，日本好快连中国车尾灯都见唔到，所以我建议大家买长綫股投资，一定要睇住内地几家著名品牌，无点你。」系罗，好快可以港车北上，如果稳阵计，买国产电动车就OK啦，因为维修同充电都好方便，第二时可以由中环揸车直上广州，唔使行路咁劳嘈啦。
张翁话，天气忽冷忽热又潮湿，最好系食山珍野菜，茶楼老板话大湾区近年兴呢味嘢，佢仲打算由内地引进。「系呢，老板又走咗返内地，早几日饮早茶话国家着重绿色发展，农业农村现代化系未来经济新动力，所以山旯旮野菜愈嚟愈潮，成为美食新风气。」听讲野菜好有益，依家疫情过后，大家都着重增强免疫力，食埋啲垃圾速食，好唔得掂，食清清地就Very Good。不过，老板就未有野菜卖，大家食住新界菜先啦。
想睇熊猫 搭飞机去中国
讲开又讲，世界经济唔好景，疫情三年，好多动物园无咗收入，养唔起珍贵动物，尤其是中国国宝大熊猫。「你知唔知，外国动物园要每年纳租畀我哋，从中国直接进口新鲜青竹，大熊猫有乜头晕身热，要请中国专家飞过去，你话要花几多钱？」系罗，大家连工都无得开，点照顾大熊猫，依家中国最有钱，就不如送返过去中国算把啦，想睇大熊猫，唔该你搭飞机去中国，最好去四川熊猫之乡，我上网见到当地山旯旮农村个闭路电视影到有「大熊猫出没」，简直好似乡里过嚟串门一样。
日本人挥泪送走大熊猫「香香」返乡下，相信以后都无乜机会再有中国国宝过来，一个时代完结了，大熊猫只有中国养得起，你送畀我都唔使考虑，。张翁话，佢三十年前去日本，日本有钱到令人羡慕，闲闲一个大企普通人员都成身名牌，放假打高尔夫球，收入高过香港公司总经理，谂都谂唔到依家变成「日本熊猫，要早啲还」。「韩国经济都好似话要过日本头，你话系咪心噏呢？」讲呢啲，大家食烧卖啦！
《星岛申诉王》于3月1日隆重登场，节目为民请命抱不平、追踪城中热话，亦会搜罗温情小故事。你申诉，我跟进，搵91999933，《星岛申诉王》随时候命！
立即报料：https://bit.ly/3IMunqd
你的独家报料一旦被采用及报导，将获得乙份奖品。
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应