饮食热话｜KOL申诉开瓶费贵 免开瓶餐厅大公开 最贵系酒店餐厅甚至唔俾带？ 订台前查清楚咪出羞
2022-11-14 00:00 
做网红（又称KOL）最忌系冇人问津，冇人讨论你嘅POST，冇人想知你讲咩。而近日呢位饮食界KOL就成功引起话题，讲紧其实只系餐厅欲收开瓶费一千元，对于好多人嚟讲，一定系觉得好夸张为佢抱不平，又或者被批评叫佢不如自己掏腰包去第二度饮好过啦。老实讲呢啲意见都系网友吹下水又搵啲嘢讲啫，而真正值得讨论嘅唔系开瓶费平与贵问题，系点解人哋会收你开瓶费呢？
背后原因呼之欲出
餐厅收开瓶费，最主要原因系想大家消费佢哋啲酒，最初开瓶费只是一项服务费，服务费的背后是要弥补餐厅在卖酒的同时，但你选择自携餐酒而做成的差额损失，因为只要不准许自备酒精，顾客就有机会消费餐厅的酒。为吸引顾客，餐厅就想出呢项附加费，你可以带酒，我会象徵性收取服务费叫corkage，如果系白酒帮你雪住先，俾埋冰桶你一站式服务。
例如在美国曼克顿区的餐厅，平均收取的开瓶费是$15-$20美金一支（$117-$156港元），如果高级餐厅则会收$30-$85美金一支（$234-$663港元）。当然，餐厅给予客人去选择背后还有一个因素，就是知道他们的酒未必符合客人口味与期待，但不想流失客人，因此给予选择。
香港呢？我哋食大排档一般唔会收你开瓶啦，餐厅？咁好明显就要睇食咩菜式，有侍酒师嘅餐厅一般都对自己嘅wine lists好有信心，所以收高价开瓶费，无非系想大家饮佢嘅酒，唔好自己带。当然有啲私房菜系做熟客为主，自携一支酒分分钟贵过食呢餐饭，所以有啲老板觉得收钱都冇意思，不如大家开心仲好。或者唔收开瓶，熟客多啲嚟，叫多个餸都唔定。
免开瓶费餐厅大公开
讲咗咁耐，讲返该名KOL就供咗个免开瓶费嘅餐厅名单出嚟，加埋其他网页嘅资料，呢度综合咗五间餐厅资讯俾大家。
免开瓶费餐厅一览︰
Pheromone - Steak House
食啲咩？ 至出名食牛扒，主打系「牛肉 Omakase」。订座要利用facebook选contact us一项﹐不接受电话订座。
地址︰大坑莲花宫西街1-9号地铺
订座︰6437 9739
ABC Kitchen
食啲咩？上环市政大厦的隐世餐厅，主理法式、巴西式、西班牙式等名菜如法式鸽子千层派、西班牙烧乳猪等。
地址︰上环皇后街1号皇后街熟食市场7号铺
订座︰9278 8227
The French Table
食啲咩？法国菜，香煎鹅肝配红桑子汁、法国生蚝、法式焗油封鸭脾、法式焦糖炖蛋。免开瓶费亦免切饼费，开心。
地址︰湾仔轩尼诗道239号23楼
订座︰6112 8116
J.L. Private Kitchen
食啲咩？私房菜，老板亲自下厨，白酒忌廉法国蓝青口、法式香煎鹅肝意式番茄莎莎脆多士等，唔收开瓶费同切饼费，已经开始预订圣诞节同平安夜套餐，附设早鸟优惠。
地址︰尖沙咀山林道23号2楼
订座︰9432 4188
La Maison
食啲咩？主打葡式及法国菜，招牌菜有安格斯肉眼扒、蘑菇汤、苹果批等，唔收开瓶费，属于另一间又隐世又有惊喜嘅私房菜。
地址︰湾仔汕头街2号广泰楼1楼B室
订座︰2628 3888
最贵系酒店餐厅甚至唔俾带？
其实坊间有好多餐厅，收corkage都算系价钱合理嘅，例如小编之前都采访过上环Table by Sandy Keung，高质净化海鲜，招牌菜系蟹膏蟹肉蟹籽伴蒜香越光米，餐厅都系BYOB Friendly（BYOB行内术语︰Bring your own bottle），不过条件系BUY ONE, FREE ONE，即要先同佢哋order一支酒你先可以免开瓶，又或者收$300开瓶费。
以下有个网页就列出香港99间酒店餐厅，收费嘅开瓶费用，可以俾大家参考下，不过有冇新update就唔知啦，小编都系建议大家，订台前问清楚，咁就唔会尴尬出羞。
收开瓶费之酒店餐厅一览︰https://www.onexcel-outlet.hk/blog/99-restaurant-hotels-open-bottle-fee/
(资料来源︰新红酒网上平台 - On Excel Wines Outlet)
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应