千奇百趣｜铺头猫摄影比赛 海洋生物潜摄大赛 最难影系咩题材 有咩国际赛值得参加
2022-11-11 00:00 
猫店长百态全捕捉
作为猫奴嘅小编，一见到呢个POST「铺头猫」摄影比赛就忍唔住同网友分享，呢个摄影比赛斋睇题目已经好清楚知道主题，简单嚟讲就系去影低，你平时有见过嘅「猫店长」，然后附上标题、拍摄地点及拍摄器材等资料交俾大会，另以不多于200字嘅中文字，分享拍摄意念、跟「铺头猫」与店铺相关嘅故事，截止报名日期系11月30日，如果想参加就要快啲实地考察，帮你相属社区嘅「店长」拍返啲沙龙照啦，佢同你分分钟一镜成名，出名过忌廉哥㗎。
查询︰https://ideal-bookstores.com/competition3/
潜水员限定水底摄影
讲开摄影比赛，其实香港每年都有唔同机构会举办赛事，而且好多比赛题目，都系大家意想不到嘅，包括专为潜水员而设的「香港潜摄大赛」，举办目的系为咗令大家更加珍惜香港海洋资源，宣传香港海洋生态及海洋生物之美，加强公众对海洋环保的意识，于是由渔护署及香港潜水总会合办嘅呢个赛事，由2012年开始就一直举办至2021年，不过碍于疫情问题，得奖作品只系有限度响两大商场展出，仲设立咗网上虚拟展览。但系今年就一直未有消息，似乎2022年度嘅比赛就未必会举行，又或者各位潜水员储定相先，总有出头机会嘅。
查询︰https://www.afcd.gov.hk/tc_chi/conservation/con_mar/con_mar_edu/photo_com_2021.html
网上虚拟展览︰https://www.golocal360.co/HKUPVC2021/index.htm
拍山顶缆车有机会赢Fujifilm相机
无论系「巴胶」、「电车男」呢啲称呼有几咁差都好，总之对于交通工具嘅热情与爱载，旁人系唔会明。但讲到交通工具嘅摄影比赛，就无论你系咩人都可以参加嘅。由于第六代山顶缆车已于今年嘅8月27号投入服务，为咗庆祝呢件盛事，山顶缆车联乘 DCFever 合办《经典重现 • 第六代山顶缆车摄影比赛》，等大家可以发挥你嘅创意，用常人睇唔到嘅视觉去呈现山顶缆车同沿途风景嘅优美与独特性。截止日期系11月16日，所以话......唔好急但最紧要快，而冠军就有机会获得Fujifilm相机X-T3连XF18-55mm相机套装。
查询︰https://www.dcfever.com/news/readnews.php?id=33753
有咩摄影比赛最难搞？
讲到摄影比赛嘅主题，最容易影就系有晒特定主题同范围嘅，例如上述几项都系主题鲜明，缆车就缆车、铺头猫就铺头猫，唔需要伤脑筋谂太多，只系集中响故事性及构图想表达啲咩，但有一类比赛系连主题都有啲难度，例如曾有机构举办过主题为「启发人心正面能量」，呢类主题就比较讲情感，范围好大，就真系要自己发挥。另外小编又见过有一主题为「集点香港」嘅摄影比赛，原来系以「建筑」为主题，呢类题目最难搞，但相对发挥空间大，大家不妨又试下挑战。
想冲出国际要玩呢啲
如果你参加摄影比较想出名，咁就要拣啲国际性少少嘅大赛啦，例如由即日起至12月5日截止报名嘅「香港摄影大赛2022」，由国家地理杂志主办，比赛区分多个组别，包括风景、生态、城市、人物、手机及短片等，绝对系高手过招嘅大型赛事。另外，Sony 世界摄影大奖赛，亦系一个好正嘅摄影大赛，如果本身已经系响摄影界工作，不妨参加专业组别赛事，另外仲设社会、学生及青年组，参赛者最高有机会获得奖金25,000美元，亦能获得Sony网站内全球曝光的机会。
查询︰https://www.worldphoto.org/competitions
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应