李辰安 - 打工皇帝系边个？｜辰来之笔
2022-04-19 00:00 
今朝一早畀大师兄个信息惊动，重点唔系下午去边度饮茶，而系香港有位打工皇帝，去年加薪超过一成半，计起上嚟一千六百万元一个月，若以工作八小时一天计，一分钟搵一千一百一十一元。
我成日惊4月公司有大动作，减人又减薪，好在老板都无咁绝情，大家无人工加，人手自然流失就算。讲老实，我唔觉得有几惊喜，事关好多年都无人工加，疫情之下又如何，我无买支红酒贺下佢之心情，反正做得一日得一日，无得做就返大湾区生活，嗰边有好多香港影视红星过咗去，大家生活唔会有改变。
见到打工皇帝收入破纪录，我就有少许动容，因为年轻时发梦做青年才俊，人家问︰「点先至系青年才俊？」我当时答案好简单，四十岁以下，年入一千万元就系嘞。回想三几个十年，你一年唔搵得十个一千万，真系唔好同人讲你系成功人士，真正封王的话，新标准系一千一百一十一元一分钟。
何解我会感到兴奋？关我乜事，日薪一千一百一十一元喺今日嚟讲便是笋工，你想点？我想是回到当年毕业有幻想之时，打工皇帝当年都未上榜，香港主要最高收入人士系洋人！估你唔到，今时今日由华裔人士夺冠，你话系咪好事。
又到食饭时间，张翁首先到，我同佢两个人坐低，吹下水，吹到每分钟赚一千一百一十一元之花边新闻，佢老人家慢慢品尝一下铁观音，好有感慨话︰「我都几十岁，搵几多我无乜所谓，最紧要身体好。」我点头同意︰「系嘞，有健康仲要全世界无瘟疫至好噃，如果唔系大家点去旅行？张翁你想去边度玩？」
话口未完，大师兄与银行伟出现在隔离枱，银行伟起身过来答话︰「睇电视见到靓姨姨介绍北国风光，冰天雪地几好情趣，我想去玩下。」我心谂，欧洲依家局势唔多稳定，能源、粮食分分钟有问题，仲有你讲嗰啲北国风光，同俄罗斯是否有边境接壤呢？大家要小心至好。
「安仔，你都九唔搭八，伟哥咁好心情，你就焚琴煮鹤，不如你帮大家叫啲点心食先啦。」大师兄，我就建议都系保守少少，去日本算啦，再唔系去澳洲行下，相信几稳阵。「讲开又讲，依家分分钟上落十几万都无用，成个世界好似愈来愈局促，有钱又点？不如捐去有需要国家啦。」系噃，香港有年轻名人搞网上捐款畀某欧洲苦难国家，一晚有十几二十万咁话。
施比受更有福，唔知点解，经过今次新冠大流行，再加上一场欧洲军事冲突，好多人变得更加佛系，好似睇得好开，正所谓去返港姐之心头愿望︰「世界和平」，以前听落以为几好笑，今日觉得好有深度。
大家都系叫虾饺、烧卖，最好加碟肠粉，食住先，等阵睇下老板有乜好介绍。「香港后生仔最励志唔系搵一千几百万一个月，而系月入三万，有层三百方尺住宅，每三个月可以自由转换工作环境。」系咩，好似听过，后生仔眼界同我呢一辈好唔同，老实讲，唔系租又唔使供楼，月入三万几OK，最紧要系自由人，唔系跟住一个老板搵食，最好系有如日本浪人武士，随时随地做自己认为啱做之事。
「辰哥，点解后生仔唔想月入十三万，住一千三百方尺住宅，自己做老板？」真系问得好，后生仔创业会更加自由，不过，你知啦，创业好多时系一份二十四小时之工作，等如剥夺一个人之大半人生，你当打之年日夜咁做，当你好成功又点？你无办法可以中途开放。于是者，到有一日你想休息之时，你已经一把年纪了。
系噃，我应该明白打工皇帝只系笋工之一，而不是代表全部，如果今日我还年轻，我都有可能幻想月入三万，住三百方尺，过自由工作之生活。人唔怕Hea，最怕你无梦想，搵银唔系衡量幸福之唯一标准，其实，我喺中环返工多年，都好想转变一下，倒如去海边餐厅做月入三万之咖啡师，然后可以去澳门做葡国菜，然后返大湾区拍下视频做网红，搞下搞下，有时间就去日本玩几日，呢种生活先至系生活。
「世侄，你想多咗，饮啖茶消下滞啦。」张翁，大家咁话，身体健康！
關鍵字
最新回应