李辰安 - 春暖花开 最好返乡下｜辰来之笔

全世界都好似要跟新冠讲Bye Bye，去到茶楼见到老板过嚟招呼大家，头一句问︰「几时Plan去日本游？」

春暖花开，此刻香港又正式宣布开启新一章，大家心情很好，不过，大师兄问我︰「开启乜嘢新一章？咪又系咁啫。」我心谂，系人都知我讲乜啦，你系要抬杠，唔通我同你拗咩。「世侄，不如讲下你有乜新春大计，例如几时去大湾区睇楼盘。」

我刚刚自己坐低，想叫笼四宝鸡扎，忽然觉得大家好似当疫情已过，病毒好似识跟人走咁……跟边个人走呀？嗱，唔好句句将到我实，好无瘾呀，大师兄，你不如都系食个叉烧包先。张翁，依家内地都系打仗咁，几时顺利通关，恢复以前唔使隔离，不知要等到几时。「系，不过，香港系国际都会，应该好快同国际接轨，而世界各地都当新冠系流行性感冒，你去日本就OK，去新加坡都得。」

老板又好风骚咁行过嚟︰「点呀，各位好朋友，不如蒸条鱼啦。」唔使咁大龙凤，下次先啦，不如整个斑腩煎米粉。「讲时讲，呢个暑假可以去日本自驾游，你睇有冇问题？」老板，我又唔系话事人，又唔系玄学大师，我又点会识答你呢个敏感问题，不如同我哋写多个炒时菜，简简单单，咁就Very Good嘞。

银行伟最后一个到，早排港股好燶，依家日日反弹，连个楼市都好似有反应，相信佢又返去分分钟上落几十万之忙碌日子，恭喜晒。「哗，几乎唔记得约大家饮茶，今日真系好忙。」我温馨提示一下，依家仲系二人限聚，唔该你唔好行过嚟，坐去隔离位先，刚才我都系博大雾坐近去同张翁、大师兄倾几句。

「伟仔，今日有乜心水投资笋盘？」张翁话，大家可以侧侧膊唔多觉，总之二对二饮茶倾偈，等阵个斑腩煎米粉叫老板同大家分上。

食到离行离列，都算系我咁大个仔第一次之经历，不过，大家都惯啦，反而一桌十个八个人可能会唔适应。「有人话香港有几百万人中咗，我都唔知仲使惊乜嘢，美国、英国可以唔使戴口罩，日本、新加坡、澳洲、纽西兰同埋好多北欧国家都当无事，如此这般，不如就当系曼德拉效应，第二朝大家起身，问一句︰吓，有大流行咩？冇噃，好似，你有冇记错？」对，呢个世界好在有曼德拉，选择删除记忆系好聪明之方法，嘟一声，呢个世界就会无事，大家又何必太过在意。「安仔，你几时开笔写个《新冠曼德拉事件》故事，依家好有场景气氛，唔好再左思右想，日日浪费时间。」

其实踏入2022年，进入虎年开始到今天，所有日子大家都唔想记得，好想好想有个掣一揿，记忆马上烟消云散，系咪？「辰哥，睇好多评论，再过两个零月就有好日子过，系咪呢？」我望下大师兄有乜反应，佢食紧叉烧包，好专心咁食。于是我回应银行伟︰「我不如帮你买本虎年运程，睇下今个农历七月系唔系会雨过天青，乌云尽散好过啦，我唔识答你噃。」

好嘞，老板帮大家分好个煎米粉，四个人一人一碗，啱啱好，大家食嘢先，唔好又讲啲咁鬼闷之话题。「系嘞，伟哥你日日上落一亿几千万，呢排赚唔少，几时去日本旅行？」大师兄隔枱呼应，佢话日本好多好嘢食，如果有人组团，一定报名。「世侄，日本真系好想开放旅游，呢几年真系好难捱，听讲好多日本名店都摺埋，如果第二日去到日本，你可能会摸门钉。」其实中环都系啦，都唔使讲九龙尖沙嘴嗰条弥敦道，唉，见到都心烦。

老板又行过嚟，佢想去日本买楼，因为上网见到好多视频介绍日本有好多笋盘。「老板，日本唔系我杯茶，我识嘅朋友一系移民去英国，一系过去台湾找寻小确幸，而我就好想返大湾区置业。」

日本话好难学，我唔识，你教我都唔晓，去玩几日无问题，走过去住？人哋未必欢迎香港人，因为日本人讲嘢阴声细气，我哋讲嘢就中气十足。「周润发扮演村长嗰套戏有句名言，我讲嘢大声唔代表我无礼貌，不过外边唔系好多人会欣赏香港人之礼貌，我唔会当日本系乡下罗。」

返大湾区就同声同气，事关依家好多香港人过咗去，所以大大声讲香港话，无问题。好啦，望下只表，三点啦，我要返Office了。