辰来之笔｜我的元宇宙经历

人生最大幸福不是睡觉睡到自然醒，而是发白日梦，发到灵魂差不多出窍，好似真系置身其境。

这一天天气乾燥，最好是饮几杯啤酒润一润。「安仔，你读书到o依家都锺意发白日梦，我最记得你上通识课畀历史系讲师闹到你七彩。」记得，好记得𠻹。我等齐其他两位酒友先至开坛，因为故事好精采又好笑。张翁首先到步，好似有几声咳，所以唔想饮啤酒，直情斋饮威士忌，听讲话可以润喉。我话，你不如饮杯热柠乐啦。

「世侄，当日你发个乜嘢白日梦？」银行伟及时而至，即时打断张翁话柄︰「辰哥好In呀，你估发白日梦好似你谂咁简单，o依家系AI加虚拟真实之高科技时代，混而为一开发之最新领域叫做元宇宙，即系你可以戴住个AR头盔，如此这般便可以令你有如云游太虚，造访一个虚拟真实的宇宙。」银行伟讲到论论尽尽，呢单新闻出咗好耐啦，facebook老细朱克伯格（见图）已经宣布要大力开发呢门科技生意。元宇宙个名好型，说穿了也不过又是互联网的一种玩意，讲到乾坤大挪移咁，吹到改宇宙时空咁巴闭，我读得书少，你唔好呃我啦！

「安仔今次就无九唔搭八啦，佢好知道互联网玩意，因为佢以前做过科技公司。」系，不过我系做宣传工作，写下新闻稿啫，并无参与科研工作，事实我系文科生，理科嘅嘢，莫说我唔识，你教我都唔晓，不过，当日公司老板之一就有教过我互联网的东西。

「呢位老板后生过我好多，而且系洋人，当时互联网开始普及，佢要教晓我点样去吹呢门新玩意。」大家食住花生听我回忆2000年之前的往事，真系好似回到校园上Tutor之朴实环境。「老板话，有咗互联网可以改变时空，因为以前大家要沟通对话，除咗面对面之外，最先进系打电话，但系打电话要对方接电话，先至可以进行沟通，是不是？有咗互联网就可以用Email啦，你Send讯息过去，就算对方唔系即时在位都No Problem，你返埋位见到个『E猫』，你咪可覆返对方，唔使系咁拨电话，要对方接到为止。」

银行伟话︰「咁就叫做改变时空，你嗰位洋老板都几吹水唔抹嘴！」系，佢真系几叻仔，佢家初创公司好快搵到买主，于是返去美国矽谷再挑战自己，o依家发咗未就唔知！「世侄，原来你做过IT人，嗰阵时有无学小小超剪番个IT Look？」世伯，唔好玩啦，小小超二十几三十年前剪个IT Look要三千银，何况，当时我大把头发，今时今日就真系要剪个IT Look。「辰哥，如果要剪到咁青，出入要戴番顶帽，好易冷亲呀。」有心，我咁大个人会识得保重身体。

「喂，安仔，你撑船撑出去大西洋，先头讲开你发白日梦，你就讲科网泡沫。」系，我话过人生最幸福系发白日梦，尤其是像真度愈高之白日梦，呢啲梦你都发得到就真幸福。「各位，呢个原本系校园小品故事，话说当年小弟读过两年书，乡下大学一个迷途小羔羊，辰安。」大家请鼓掌！

「安仔，唔好咁多口水，其实好简单，呢件迷途小羔羊因为知悉历史系有位系花会上呢一课，于是佢九唔搭八又去上罗。」多谢大师兄帮我讲开场白，唔该交番个场畀我，你坐番低陪张翁饮杯威士忌先。「每个星期两节课，同系花近距离在同一课室坐足近两个钟头，你话几赏心悦目呢，之不过，呢科历史通识又真系唔系我杯茶，有一次改去细课室上堂，室内气温暖笠笠，于是我顶唔顺啦，听下听下，竟然半瞌着眼，当时好似离开个躯体咁，去到一个虚拟似真世界，半发梦约到系花星期六一齐出城睇戏……」当时梦境好似好真实，加上与发梦对象是近距离，所以呢个白日梦如此Perfect。

「就系咁，呢个九唔搭八瞓着之后，又忽然扎醒，仲要唉一声，惊动了历史系讲师，佢非常之严肃教训大家，叫我哋尊重一下课堂规则，边个想瞌眼瞓，可以随便外出，不过唔好阻住别人学习。」大师兄当日的确好无辜，讲师系有品先至唔点名指责我，我明。

「你明就好，成日都发白日梦。」嗱，你闹埋我呢次好啦，因为有咗元宇宙之高级互联网之后，发虚拟真实白日梦就会好似今时今日玩手游咁方便。「辰哥，元宇宙概念股早排轮流爆升。」咪就系罗。好啦，饮多杯一样可以虚拟真实，大家乾咗佢。