辰來之筆|我的元宇宙經歷

2021-11-23 00:00
  人生最大幸福不是睡覺睡到自然醒,而是發白日夢,發到靈魂差不多出竅,好似真係置身其境。  
  這一天天氣乾燥,最好是飲幾杯啤酒潤一潤。「安仔,你讀書到o依家都鍾意發白日夢,我最記得你上通識課畀歷史系講師鬧到你七彩。」記得,好記得𠻹。我等齊其他兩位酒友先至開壇,因為故事好精采又好笑。張翁首先到步,好似有幾聲咳,所以唔想飲啤酒,直情齋飲威士忌,聽講話可以潤喉。我話,你不如飲杯熱檸樂啦。
  「世侄,當日你發個乜嘢白日夢?」銀行偉及時而至,即時打斷張翁話柄︰「辰哥好In呀,你估發白日夢好似你諗咁簡單,o依家係AI加虛擬真實之高科技時代,混而為一開發之最新領域叫做元宇宙,即係你可以戴住個AR頭盔,如此這般便可以令你有如雲遊太虛,造訪一個虛擬真實的宇宙。」銀行偉講到論論盡盡,呢單新聞出咗好耐啦,facebook老細朱克伯格(見圖)已經宣布要大力開發呢門科技生意。元宇宙個名好型,說穿了也不過又是互聯網的一種玩意,講到乾坤大挪移咁,吹到改宇宙時空咁巴閉,我讀得書少,你唔好呃我啦!
  「安仔今次就無九唔搭八啦,佢好知道互聯網玩意,因為佢以前做過科技公司。」係,不過我係做宣傳工作,寫下新聞稿啫,並無參與科研工作,事實我係文科生,理科嘅嘢,莫說我唔識,你教我都唔曉,不過,當日公司老闆之一就有教過我互聯網的東西。
  「呢位老闆後生過我好多,而且係洋人,當時互聯網開始普及,佢要教曉我點樣去吹呢門新玩意。」大家食住花生聽我回憶2000年之前的往事,真係好似回到校園上Tutor之樸實環境。「老闆話,有咗互聯網可以改變時空,因為以前大家要溝通對話,除咗面對面之外,最先進係打電話,但係打電話要對方接電話,先至可以進行溝通,是不是?有咗互聯網就可以用Email啦,你Send訊息過去,就算對方唔係即時在位都No Problem,你返埋位見到個『E貓』,你咪可覆返對方,唔使係咁撥電話,要對方接到為止。」
  銀行偉話︰「咁就叫做改變時空,你嗰位洋老闆都幾吹水唔抹嘴!」係,佢真係幾叻仔,佢家初創公司好快搵到買主,於是返去美國矽谷再挑戰自己,o依家發咗未就唔知!「世侄,原來你做過IT人,嗰陣時有無學小小超剪番個IT Look?」世伯,唔好玩啦,小小超二十幾三十年前剪個IT Look要三千銀,何況,當時我大把頭髮,今時今日就真係要剪個IT Look。「辰哥,如果要剪到咁青,出入要戴番頂帽,好易冷親呀。」有心,我咁大個人會識得保重身體。
  「喂,安仔,你撐船撐出去大西洋,先頭講開你發白日夢,你就講科網泡沫。」係,我話過人生最幸福係發白日夢,尤其是像真度愈高之白日夢,呢啲夢你都發得到就真幸福。「各位,呢個原本係校園小品故事,話說當年小弟讀過兩年書,鄉下大學一個迷途小羔羊,辰安。」大家請鼓掌!
  「安仔,唔好咁多口水,其實好簡單,呢件迷途小羔羊因為知悉歷史系有位系花會上呢一課,於是佢九唔搭八又去上囉。」多謝大師兄幫我講開場白,唔該交番個場畀我,你坐番低陪張翁飲杯威士忌先。「每個星期兩節課,同系花近距離在同一課室坐足近兩個鐘頭,你話幾賞心悅目呢,之不過,呢科歷史通識又真係唔係我杯茶,有一次改去細課室上堂,室內氣溫暖笠笠,於是我頂唔順啦,聽下聽下,竟然半瞌着眼,當時好似離開個軀體咁,去到一個虛擬似真世界,半發夢約到系花星期六一齊出城睇戲……」當時夢境好似好真實,加上與發夢對象是近距離,所以呢個白日夢如此Perfect。
  「就係咁,呢個九唔搭八瞓着之後,又忽然扎醒,仲要唉一聲,驚動了歷史系講師,佢非常之嚴肅教訓大家,叫我哋尊重一下課堂規則,邊個想瞌眼瞓,可以隨便外出,不過唔好阻住別人學習。」大師兄當日的確好無辜,講師係有品先至唔點名指責我,我明。
  「你明就好,成日都發白日夢。」嗱,你鬧埋我呢次好啦,因為有咗元宇宙之高級互聯網之後,發虛擬真實白日夢就會好似今時今日玩手遊咁方便。「辰哥,元宇宙概念股早排輪流爆升。」咪就係囉。好啦,飲多杯一樣可以虛擬真實,大家乾咗佢。
  
關鍵字

最新回應

相關新聞

熱門文章