误杀患病妻获轻判 81岁丈夫倡有「安乐死」

筲箕湾耀东邨前年6月发生伦常命案，独力照顾病妻的8旬老翁「黄伯」黄国万，不堪妻子长期受病痛折磨，以竹棒勒毙对方并意图自尽，最终打消念头自首。承认误杀的黄伯今月初获法官轻判入狱2年，扣除已服刑期，预料不日出狱。他今透过立法会议员张超雄传话，直言「我觉得香港要有安乐死，咁样社会就唔使嘥咁多资源，穷人唔使咁惨」。他又指香港的穷人无能力获得老人服务，「蝼蚁尚且偷生，但病起上嚟系无选择」。

案发于前年6月6日，81岁的黄伯在其寓所内杀害其76岁妻子林美琴。据了解，根据惩教署规定，判刑前已被还柙18个月的黄伯，即使扣除狱中行为良好的刑期宽减，仍需多待在狱中1个月才可出狱。

一直有跟进本案的张超雄今早探望过黄伯，黄伯指自己身体安好，精神不俗，并多谢法官法外开恩，又感谢家人、市民、记者的关心。他坦言出狱后想「平静地过日子，做返一个普通人，出返嚟之后暂时唔想见人，亦唔想再提呢件事」。

对于传媒关注的照顾者问题，黄伯直言「香港嘅老人服务唔系无得做，但要系中上阶层、有钱人先会用得起，我哋呢啲低下草根阶层做唔到」。黄伯既无钱聘用工人，又无钱请人看顾病妻。他曾在案发前带妻子到老人院，见过有长者「系识抖气，但唔识郁，连说话都讲唔到」。他心想「一个人最困难就系生不如死，我明白蝼蚁尚且偷生，但病起上嚟系无选择。」

黄伯续指：「我知道社会唔系咁接受安乐死，讲出嚟实俾人闹，张议员帮我讲出嚟，佢都会俾人闹。但只有生活有经验、受过折磨嘅人，先会明白点解我会提出要有安乐死。」他期盼社会上「有多啲同路人，大家同心合力，社会同埋制度先会有改变，社会要多啲帮助穷人」。


全文如下:
「多谢大家嘅关心同埋问候，我都一一收到。字我唔识得多，希望张议员帮我传话。我嘅故事已经喺法庭公开，希望呢件事告一段落，我亦都透过张议员收到唔少记者邀约访问，不过我最想系平静地过日子，做返一个普通人，出返嚟之后暂时唔想见人，亦唔想再提呢件事，希望记者明白，亦都唔希望记者喺我屋外附近等候，否则我都不知道出返嚟之后可以去边度暂住。

有关照顾者嘅问题，我觉得香港要有安乐死，咁样社会就唔使嘥咁多资源，穷人唔使咁惨，我哋唔会有钱请工人，唔会有钱去请三更看护。我曾经带太太到老人院，见过有老人家净系识抖气，但唔识郁，连说话都讲唔到。一个人最困难就系生不如死，我明白蝼蚁尚且偷生，但病起上嚟系冇选择。香港嘅老人服务唔系冇得做，但要系中上阶层、有钱人先会用得起，我哋呢啲低下草根阶层做唔到。

我知道社会唔系咁接受安乐死，讲出嚟实俾人闹，张议员帮我讲出嚟，佢都会俾人闹。但只有生活有经验、受过折磨嘅人，先会明白点解我会提出要有安乐死。

最后，我认为社会要有多啲同路人，大家同心合力，社会同埋制度先会有改变，社会要多啲帮助穷人。」

法庭记者：黄梓生

建立时间：1620
更新时间：1850