维港会：全家外游纠结是否请埋外佣 雇主求助被问：公干会否自费？

问有请外佣嘅朋友一个问题，若果你计划全家去旅行，会唔会带外佣？或者有人会，有人唔会，但如果会大家又会点做？

对于呢个问题，有一位雇主就系Facebook群组「外佣雇主必看新闻讯息」出po问，佢话正计划紧全家去旅行，两个小朋友都大个，一个21岁、一个11岁，唔使外佣姐姐照顾。佢话之前都有叫过姐姐一齐去北京旅行，当时住五星级酒店都系全包，但因为今次两个仔都大个，就唔使佢照顾，所以就问大家，今次旅行好唔好叫姐姐夹返钱，而佢计过条数，话机票连同酒店，人均4000元，如果连同饮食同门票，应该每人6000元。

佢又话，今次系「斋玩」，唔使凑小朋友，毋须工作，虽然佢都有强调话「无谂住叫佢畀钱」，而且又话姐姐称唔想一个人系屋企，所以都想去，所以问网民「惯常做法…会唔会叫佢畀返少少钱」。

对于呢个问题，网民一面倒认为唔应该要姐姐夹钱，仲反问返楼主「你老细叫你出trip，但要你自己畀部份钱，你有咩感觉？」，仲话「第一次听要收工人钱」；亦有网民话要俾返出差钱工人「去到都系帮你做工人咋哦，应该收返出差费就真呀」，而楼主就回覆网民留言，强调姐姐系自愿想去，有网民更直斥「唔好讲到咁伟大，好似益人去」，有网民问「咁你坦白问下佢自费去唔去？」。