维港会:强迫分享玩具? 男童拒借畀陌生人 反遭对方嘲讽

唔少家长都有带小朋友公园玩，通常小朋友都会拎埋玩具去玩，不过如果有个陌生家长问你嘅小朋友拎玩具玩，你会唔会借？日前Facebook群组「生仔要考牌系列」一名港妈开po抱怨遇到极厚面皮嘅怪兽家长，要求囝囝将玩具电动车借畀佢小朋友玩，当囝囝拒绝时，反遭该家长冷嘲热讽，话「人哋唔分享都冇办法㗎！」

该出po嘅港妈指嗰架玩具电动车，早几个月前系老爷奶奶买畀囝囝嘅生日礼物，佢叉足电第一次持落街俾囝囝玩，玩嘅期间都有好多家长同小朋友经过望住，但都无小朋友走埋嚟，只系远望。但有一对经过既母子拖住小朋友行埋嚟，当时架车郁紧，所以佢就提示小心，唔好行咁贴，怕撞到嗰对母子。

然后港妈就听到对方儿子话好想玩，就直接走去同港妈个囝囝讲「畀佢玩」，囝囝即时拒绝，该小朋友听到就扭计，喺度喊话好想玩，小朋友妈妈就再次同囝囝讲「点解呀？佢好想玩呀！你借比佢玩唔得咩？」，囝囝再次拒绝，小朋友听到就喊得更大声，然后该家长就好大声话「人哋唔分享都冇办法㗎！」，港妈话好似系讲埋畀佢听咁。

港妈又指，对于认识嘅小朋友，囝囝好乐意一齐玩，唔介意借。「架车系属于我地自己私伙嘅，就算我仔唔肯借我都唔会话佢！同你又三九唔识七！」。

网民亦留言表示支持港妈，称「滥用分享」；有网民认为，应该先有礼貌咁问咗对方家长，然后先再问小朋友会好啲，唔好咁「老奉」：「唔关乎价值， 要借人嘢玩就系咁架啦」；亦有网民戏言「叫嗰个妈妈分享佢副身家俾你嘛」、「Share个银包先讲喇」。