港妈携儿赶回校考试 红的司机上车闹到落车：有绿的你唔坐

坐的士真系随时要受气！一名港妈在facebook群组发文，指日前早上与儿子赶住回马鞍山区内学校考试，眼见迟迟无新界的士，于是匆匆登上一辆市区的士，结果由上车被闹到落车。

港妈在facebook 群组「马鞍山之友」发文指，与孩子登上一辆红色市区的士。虽然一上车就有表明「司机唔好意思，等左好耐无绿的士，小朋友就够钟考试」，未料的士司机随即反驳「有绿的你唔坐」。港妈试图解释「我话落雨，等好耐无绿的」，的士司机居然质疑「我又见你唔到，点知你系咪等咁耐」。

港妈继续解释「你都见我系绿的到行过嚟啦，小朋友考试唔可以迟！唔该你啦」，司机责怪「明知考试你唔早出门口，唔早起身」。港妈又再反驳，「你点知我无早出门口？」。车程到一半时，司机更停车指向其他的士，「你睇，有的士啦！香港政府咁好，设有Uber，绿的又平，你都唔坐，仲要驳我嘴，你依家想点？」

港妈终于忍无可忍，反击「有绿的我使求，你依家我问你想点？」，港妈称「我日日都坐的士，我问过呢个位系红的/绿的都可以嘅。我小朋友考试，你唔好吓亲佢，请问你系咪无屋企人嘅？我一上车都话唔好意思，又唔该你，车你又开左一半，仲问我想点？」。

不少网民支持港妈，声讨的士司机欺人太甚，「长又话远唔识路，近又话赚得少唔载，最好唔驶做就有钱袋喇好无」、「就算唔跳表啊，都有权搭的士罗」。