【沙漠拍剧】大风到擘唔开眼 胡定欣照拍喊戏

胡定欣、姚子羚、张振朗、曹永廉等演员，近日身处新疆赶拍无綫新剧《包青天再起风云》。虽然离港多时，但向来亲民的定欣都有定时在社交网更新一下自己的近况。最近定欣在社交网甫了新相，相中的她又要骑骆驼又要行沙漠，更因当地好大沙尘，所以她要用黑纱包头。她留言话要拍一场同公孙策滚地沙的戏，更讲笑咁留言话：「今次真系变沙翁」！

虽然拍摄过程艰辛，不过定欣似乎好享受拍摄过程。定欣话：「今朝嚟到仲觉得好开心，因为人生第一次嚟到沙漠，觉得好靓，但拍咗无几耐，就开始收太阳起风沙，我都豁出去，碌沙，瞓地，感受一下呢个环境，风沙兜口兜面吹埋嚟都唔理，点知愈来愈大风，仲要今日系拍感情戏，要喊，我仲谂，乾到咁，大风到咁，眼都擘唔开，点喊。最后…又喊得出喎…嘻嘻，点都好，今日真系有所体验，呢刻嘅我，喺被沙包住，我要返去冲凉﹗」又乾又大风都喊得出，视后即系视后，佩服！