痛心粉丝买唔到飞 黄子华吁政府正视黄牛炒卖

黄子华告别栋笃笑《金盆𠺘口》今日有信用卡优先订票，大批网民在社交平台投诉网站死Server、电话打唔通，更有虚假的售票网Whatsapp讯息流传。子华今晚在面书上载两段短片讨论黄牛飞，他提到有网民呻买唔到飞，劳气称自己及团队都冇，「黄牛」竟然因有内部渠道而有飞。

子华表示：「我觉得系咪要报警？或者报畀ICAC听呢？内部有飞系点得嚟？问题系我哋冇证据、线索去举报。不过黄牛又唔系犯法咁喎，所以每个演唱会都有同一个问题。我喺度正式同政府提出系时候正视问题，好多时我同人讲，呢啲系奢侈品，但系依家到民间每一次受欢迎嘅演唱会都系咁，普通文娱活动都受到剥削时，有关部门系咪应该正视？」

提到有人问子华是否「又食又拎」，卖正价飞兼做黄牛？子华表示团队委屈又喊晒口，他睇到这些评论都好激动，要冷静下来。「各位我冇咁嘅本事，一个表演者花咗好多精神去预备。每日临瞓之前我就谂紧嗰句嘢点讲呢？未起身一擘大眼、半梦半醒又系谂紧嗰句嘢点讲呢？我有句嘢谂咗成个月都唔知应该系点样讲，大家都好辛苦去准备一个表演，然后就系一啲完全唔需要去付出嘅人，去卖一倍、两倍、三四五六七倍嘅价钱，一啲好长期支持你嘅fans要去承受呢啲价钱。我一路都好接受世界系唔完美，但系咁系太过不完美，系太过离谱。」