【Shimba Column】Facebook触及率降之谜

Facebook又系话要整顿动态时报上嘅内容品质！之前贴文演算法嘅更新已经令到专页嘅小编都喊晒救命，今次仲降低定义为「参与诱饵」类型贴文嘅触及率，叫一众依赖Facebook 推广宣传嘅品牌媒体吸「粉丝」手法大减。咩叫「参与诱饵」类型贴文(engagement bait）？其实系指贴文中包含鼓励或诱使投票、点赞、分享，呢类post可以加强粉丝互动同曝光率。每次只要你Comment、tag，甚至只系俾个心心，内容就会透过你嘅朋友圈子扩散到动态时报上，变相帮人卖广告吸fans。以往呢类型做法都几帮到品牌或者靠内容搵食嘅媒体吸纳关注，但明显今次Facebook嘅内容整顿，打烂如意算盘之馀仲打烂埋「小编」饭碗添！更新动态时报演算法后嘅Facebook将会严格把关，一旦发现违规post，就会降低专页嘅触及作为惩罚，话就话系要降低垃圾讯息，但其中商业元素嘅考虑真系耐人寻味。近年Facebook嘅贴文演算法愈来愈复杂，新闻内容都未必显示到，唔少人已经转用新闻App或者手机版网站，恐怕一众媒体、品牌系FB专页嘅经营策略系时候要改变啦！