【天价成交】张智霖传$9180万买豪宅 同Sammi做邻居

大坑豪宅大宝阁又有惊人交易，大坑大宝阁2465方尺单位，「天价」9180万元售出，成为屋苑同类单位历史新高，今次嘅买家竟然、竟然、竟然系张智霖（Chilam）！而翻查土地注册处资料，张智霖喺以个人名义 (Cheung Chi Lam,Julian)入手。但原来同一幢楼「楼市小富婆」郑秀文（Sammi）喺1998年入市，只系2280万。 市场消息传出，Chilam入手嘅单位面积2465方尺，天价9180万元售出，折合成交实用尺价约37241元，创屋苑同类单位历史新高。据指，单位拥有无敌全维港海景，而Chilam同袁咏仪（靓靓）以及囝囝张慕童（魔童），一家三口听闻一直以嚟都系租楼住，但计落条数Chilam即使系首次置业，印花税都几百万。 睇返纪录，同一幢楼原来都有明星小业主，讲紧嘅系郑秀文（Sammi），1999年传出Sammi用2280万买入高层A室，以帐面计，单位升值几倍有多。一向投资有道嘅Sammi，仲系2008年金融海啸连扫2个豪宅，趁低价入市，市传当年只系用3000万左右，就入手渣甸山嘉云台同半山蔚皇居。