【无线开Live望平反】麦明诗冯盈盈讲好说话 雷庄𠒇：Media扭曲我

自星期日选出新一届港姐后，出炉冠军雷庄𠒇（Juliette）同「校长评判」郑裕玲（嘟姐）都成为焦点人物，Juliette的言论、家底、外貌均被品评。今晚TVB专程开厂在big big channel直播，请来麦明诗、冯盈盈及Juliette，以「师姐教路」做主题，为Juliette平反、讲好说话，都系想平息网民的骂战。 麦明诗、冯盈盈以过来人身份表示，选完港姐都有大单嘢发生，例如被人话有黑幕、靠山。当年麦明诗夺冠后都被批「说话离地离到上太空」；冯盈盈则被翻以前爆粗评论政治，佢就话：「香港小姐呢份工好难做得好，好明白Juliette喺起步，希望佢从中学习。」 获选冠军，Juliette认为评判专业，睇得出边个有潜质，唔会觉得自己最好，亦不是最差。讲返棚哨牙，Juliette已经回应过牙医男友都觉得佢唔使整，今次佢再公开讲：「我咁多年嚟，第一次有人叫我箍牙，知道自己笑容大。」冯盈盈都问佢会唔会考虑去箍牙，Juliette称：「睇人有咩意见，我其实唔想箍。」冯盈盈灵机一触畀意见：「可用牙做标志，球星大、细哨都系咁俾人分。」认真搞笑。至于被网民恶搞及改图，Juliette则看得开赞有创意、好好笑。 提返Juliette前日在instagram开直播全程用英文讲嘢、更直言唔会浪费时间翻译中文留言，对于被指有富爸爸，Juliette话相信媒体报道的网民「不够聪明」。佢今晚重申当时的说话：「我讲中文唔好，我知好多人唔锺意，我讲得唔好，会努力学。用英文系唔想人误会我，我唔系唔Care中文，比赛前叻哥（陈百祥）都有畀意见。直播我讲not well-educated，新闻有啲系错，估唔到Media可以扭曲我讲嘢，我会学好中文去表达自己。其实想人知道我系边个、态度系点先评论，唔好唔公平。最伤心系有留言『我希望你一家人可以死』，估唔到可以咁Bad。」 Juliette仲话见爸爸雷葆文被指有米，佢当时都问爸爸系咪有事隐瞒，点解自己要辛苦打工畀学费，并亲口认爸爸曾经系香港十大设计师，不过家境有唔同，唔似报道所讲咁叠水，亦唔系买冠军。冯盈盈又帮口：「钱买得起就好，冇咁简单。」 讲返参选过程，冯盈盈有睇住Juliette的表现，比赛当日更是由早到晚搞到人都攰爆，不过见住Juliette依然有活力、值得有冠军。Juliette亦以「10姊妹」称呼参加决赛的佳丽，坦言：「Kelly好靓女，10姊妹谂最上镜小姐系Emily（黄玮琦）或者Kelly（伍乐怡）拎，估唔到系我，当时好惊讶，可能以前做过Model有帮助。」