伍乐怡落选直言Surprise 赢网民欢心最紧要

港姐竞选昨晚落幕，赛前大热之一的伍乐怡（Kelly）五强止步，一个奖都冇，网民表示好可惜，希望Kelly仍能入行做艺人。那边厢有冠军雷庄𠒇（Juliette）开Live为自己发声，唔介意被批丑样，全程讲英文；这边厢的Kelly与赛前已被淘汰的胡美贻（Nicole）开心食甜品，二人全程主要讲中文，Kelly话噚晚完咗比赛好攰，返到屋企即瞓觉，今朝瞓醒发现有好多网民在社交平台窝心留言支持她，所以开Live同网民倾偈多谢大家。 讲到个赛果，Kelly直言：「有少少surprise，不过都唔系为咗攞奖，志在参与，我唔会唔开心。我戥Juliette开心，因为佢好叻跳舞，有不足的地方会教我哋，佢得奖好戥佢开心。」网民问听到入唔到三甲咩感觉？Kelly回答：「系冇感觉，返去后台罗。我知道好多人觉得冇奖好可惜，不过比起你哋（粉丝），你哋重要好多。」Nicole亦搭嘴：「已经赢咗啦」。 有人叫Kelly再参选，她与Nicole同声同气指：「唔会再参选，其实好攰，喺台上面用好多精神，依家几好，想出街就出街，食嘢就食嘢。」Kelly更向网民徵询落选后有乜好做？有人提议做YouTuber，Kelly亦大感兴趣，想同Nicole拍住上：「做KOL几好，网上平台几自由。我可以开个YouTube Channel示范整甜品，改咩名好呢？用返ngkelly_呢个名。」