周家蔚素颜直播教化妆 老公囝囝乱入劲温馨

素颜上镜对于每一位贪靓女士来讲都系好大嘅挑战，以靓样搵食嘅女艺人一定更加唔使讲！不过做咗人母嘅周家蔚（Janet）就未惊过，素颜喺FB玩直播仲教大家化妆，期间洪天明同细仔JT仲乱入，一家人好温馨。

话说噚日朝早Janet开直播，提到化妆师放假，要自己郁手化妆预备出席活动，顺便同大家分享平时点化妆。素颜嘅佢毫不掩饰，皮肤睇落好光滑冇毛孔，搽咗薄薄一层护肤品已经好有光泽。直播期间老公洪天明仲喺后面入镜，问老婆做紧咩？Janet就好温柔咁用英文答自己化紧妆做直播，老公就连声话OK唔阻住老婆。 一边化一边同大家倾偈，Janet全程都压低把声同网民交流，三两下手势已然搞掂个眼妆， 洪天明仲帮老婆手拎摆喺浴室嘅假眼睫毛出嚟，又叫囝囝准备换衫出门等Janet唔使咁赶。黐假眼睫毛嘅时候囝囝就过来，Janet笑指「我个仔又话要帮我化喇」，囝囝JT好乖咁玩同妈咪倾咗阵同玩咗阵化妆扫就走咗喇。 网民见到Janet素颜都赞靓女，话佢同化妆前后分别唔大，个妆够晒自然。另外又有网民感叹Janet一家好温馨，老公天明好贴心令人羡慕，叫佢开多啲Live分享自己生活！