Kelly Online：被批广告侮辱体育专业　欧铠淳凌晨解释「3分27秒」成绩

「美女鱼」欧铠淳早前为一家米线连锁店拍广告，但有博客撰文质疑片中提到「3分27秒」（片中为3分29秒）嘅训练时间，认为佢嘅体育专业受侮辱却无出声，更称无能力所以要喺娱乐圈「抛头露面」。 欧铠淳凌晨喺社交平台撰文回应，赢得网民赞赏。欧铠淳解释，「呢个时间字面上并唔常见，因为呢个系我练短池十个三百自嘅平均目标时间。每一个训练都有佢既目的，至于片中点解系三百唔系四百；第一系令训练有多一啲变化，第二可以延长高速度嘅时间。微电影系以我目前训练为蓝本，所以唔系就咁冲一个单次嘅时间。如果只系冲一个三百米，得到嘅强度耐力效果唔高，我教练同我追求嘅系平均速度。加上我系嗰种比赛游得快过训练嘅泳手。简单啲讲，即系从来冇喺训练时，游到过我任何一个最佳时间，变相攞比赛时间作对比就变得冇乜意思。」 佢又重申点解要「抛头露面」，系希望令大家「见到更多运动员嘅身影。我相信只要俾机会佢哋，就会有多样性嘅发展可能。」 欧铠淳嘅回应获得不少网民留言支持，认为佢讲出重点，回应得体。