【星B过复活节】陈敏之囝囝扮Nemo　雷颂德服侍苏永康B仔　

复活节长假有咩好做？娱圈的星爸星妈趁假期，都留在家中陪BB玩，叫埋朋友上屋企聚旧兼探B，一举两得。陈敏之拍下囝囝「冬至」雷子乐的呆样，著埋《海底奇兵》 Nemo造型BB衫，可爱到爆灯。敏之祝大家「Happy Easter 」，Hashtag埋B仔系「#迷你版爸爸 」，似足老公雷伟信。

珍惜同囝囝Jazz相处的苏永康，叫咗老友雷颂德孖埋老婆梁家玉（Jade）上门探B，话晒雷颂德都有三个囝囝，凑B功力有返咁上下。二话不说等Jazz饮完奶，雷颂德手势熟练地为Jazz扫风，Jazz眼仔碌碌，连帮手拍片的Jade都笑指Jazz好叹好舒服。

留在家坐月的周汶锜（Kathy）唔惊闷，有好友薛芷伦到访家中，凑下细仔Avner又陪大仔Jacques玩。薛芷伦见初生的Avner可爱到晕，忍唔住影低Avner口擘擘的样子，点知影影下，Avner呕咗少少奶出嚟，认真搞笑，Kathy又要出动服侍囝囝啦。