专栏 Will知足球│「小车仔」未来强势崛起

刚刚果轮车路士喺欧洲赛飞到最遥远嘅哈萨克，对上艾斯坦拿。领队马列斯卡唔想主力球员飞到咁远，所以都系带年轻球员去踢。即管睇下，有无边个「Sharp醒」嘅年轻球员？

连入两球嘅古奥就唔使多讲，始终佢系拉马西亚青训，个人能力就一定会有，第一个入球喺右路独闯龙潭，显示出佢嘅身体条件真系唔错。但系位置感真系麻麻哋，佢现身帮助中场搓波嘅次数系少之又少，而背身亦都唔系佢擅长嘅一环，睇下之后可以进步几多。

要讲到最好表现嘅自家青训就系泰利基佐治，于今季联赛杯同埋欧协联已经先后出过。佢1.8米左右嘅身高，畀到我嘅感觉似多蒙特嘅基顿斯，有爆炸力兼锺意盘扭，过五关斩六将，再去完成射门。虽然佢有时喺决定方面都系较为幼嫩，但系相信喺一队嘅比赛经验，绝对可以令佢成长。

始终欧协联嘅强度唔算特别高，可能比平时队内友谊赛嘅水平差唔多，不过车路士用到年轻梯队依然能够赢波，绝对可喜可贺。Willhappy