锺慧冰打击「农场新闻」开YouTube节目爆娱圈真秘闻输身家重病险死谂通晒：炒股票几乎心脏病发丨独家

2024-10-08 07:00

锺慧冰输身家重病险死谂通晒：炒股票几乎心脏病发打击「农场新闻」开YouTube节目爆娱圈真秘闻。

入行44年，68岁的锺慧冰相识满天下，收埋大量娱圈秘闻，为打击一啲莫名其妙，呃流量兼冇求证的「农场新闻」，开设YouTube节目《冰姐的花样人生》以正视听，其中一集嘉宾王书麒讲出面瘫7年的真相，原来跟万梓良及林嘉华有关。另外，冰姐人生亦非常曲折离奇，曾因雷曼事件输过千万身家；又曾患「血管炎」死里逃生，财散人安乐后反而瞓得更好，甚至零物欲连麻雀都唔打：「𠵱家睇化晒，重病时买落嘅骨灰龛位，升价一倍都已原价卖返出去。」采访：方骞平摄影：孔子

锺慧冰曾投资失利冇咗7位数身家，家阵只做定期唔使再提心吊胆。

锺慧冰罹患的血管炎亦康复了9成。

𠵱家冰姐冇晒压力。

𠵱家冰姐瞓得安乐。

睇化咗锺慧冰觉得生活越简单越好。

因为长期压力太大，令冰姐免疫系统出咗大毛病。

锺慧冰趁有气有力及有记性开设YouTube频道。

锺慧冰趁有气有力及有记性开设YouTube频道，藉住自己及嘉宾的人生经验令网民有得著，将来「走咗」都叫有嘢可以留底：「我都会讲下养生，2016年间突然患上罕见免疫系统怪病血管炎，经历一场大病乜隐世医生都涉猎过，亦睇过唔少医书，大把心得可以分享。」

毛舜筠做过冰姐YouTube节目《冰姐的花样人生》嘉宾。

老友毛舜筠喺冰姐患病期间，每周送上自家制嘅健康面包。

锺慧冰于节目中大晒昔日珍藏。

2016年锺慧冰因为血管炎，导致半身瘫痪行动不便。

大病时冰姐连手部都开始麻痹疼痛，感觉似被电击。。

唔明演戏点解真打

曾面瘫7年的王书麒亦曾于冰姐节目中提及患病经过，唔排除因当年拍剧时被林嘉华及万梓良大力掌掴的后遗症，冰姐听到好肉赤：「王书麒从拍《小时候》开始由细俾人打到大，拍剧时俾万梓良打得最多，除14岁拍《大内群英》时被掌掴，拍《流氓大亨》时又被戏中『哥哥』万子真打，冇受伤都好痛。」冰姐讲到皱晒眉：「最惨系佢19岁时演《新扎师兄1988》俾林嘉华大巴咁掴，因为冇得借位要硬食，掴完后佢晕一晕，有啲痛，宵夜时食个面，条面都啜唔到上嚟，半边面冇咗知觉，连眼都合唔埋，眼水直流…直至23年前因为免疫力低旧病复发，多年来用物理治疗，药物及做穴位耳疗等多管齐下，𠵱家只系好返9成。」虽然王书麒冇怪过林嘉华及万梓良，但冰姐忍唔住出声：「做呢行好多时话要『嚟真』，但讲明系演戏，点解要『嚟真』？好多时佢哋唔知道伤害会有几大，到知道时后悔已太迟，好多时因为太认真，会唔觉意影响人哋一生。」

王书麒以前惨被捱打。

当年拍剧时，万梓良及林嘉华曾大力掌掴王书麒。

王书麒曾面瘫7年，严重影响生活质素。

王书麒重提面瘫事件，老婆许秋怡忍唔住喊。

王书麒现身说法。

风光大葬劳民伤财

至于冰姐罹患的血管炎亦康复了9成，所以冇咁担心：「7年前状态差到连钮都扣唔到，唔知自己捱唔捱得过，为自己谂定身后事，除买定骨灰龛位外，更写埋平安纸将户口啲钱交晒畀个女…但𠵱家梗系乜都攞返，个女咁勤力大把钱啦，畀咁多钱佢唔好，我连升价一倍嘅骨灰龛位都唔keep，用原价10几万卖返畀朋友。」大病一场后冰姐心态都改变咗，变成环保人士：「以前个人好执著，既忧虑死后被火烧好痛；土葬又俾虫蛀…𠵱家乜都睇化晒，只要生前对我好，将来离世帮我开Party，大家过嚟唱下歌跳下舞就够，之后天堂见！买名贵棺木都系劳民伤财，只系做畀在生嘅人睇，我唔需要呢啲嘢。」

失婚冰姐庆幸28岁女儿林静莉好生性。

周围去探下老友，探惠英红班。

零物欲戒埋打麻雀

冰姐甚至学会断舍离，将家中少用的家电送出，例如微波炉：「其实一个人需要嘅嘢好少，生活越简单越好，以前真系错晒，咁用心去研究边间银行高息口做投资；提心吊胆炒股票，无时无刻去睇住价位上落，搞到几乎心脏病发要call白车…谂返起都好白痴，最后咪输身家，仲因为长期压力太大搞到免疫系统出咗大毛病。」锺慧冰形容财散人安乐，她将仅馀嘅积蓄做定期，手头上再冇投资，所以乜都唔使谂，晚晚瞓得好安乐：「虽然发生咁多事，但都好感恩咁嘅年纪仲有嘢做，连男朋友都有埋。不过，免疫系统病系跟一世嘅，只能控制住发炎指数，等佢唔会攻击身体各部份，否则会令器官衰竭，情况会好危险。𠵱家情绪要好平和，唔好畀自己咁大压力，小心饮食及多做运动。」冰姐家阵零物欲，食素菜，告别名牌包包，连麻雀都唔打，只enjoy种花及上唱歌班。