蔡洁甜笑误泄黄宗泽昵称「波波」 擦鞋式激赞绯闻男友零缺点丨独家

蔡洁在《法证先锋VI：幸存者的救赎》再演法医「Dr. Fan」，对于第7度跟绯闻男友黄宗泽（Bosco）合作，她力赞男方好照顾人，会煲汤包伙食，又欣赏对方能轻松面对压力，完全冇避忌，甚至赞到要自己叫停自己，好好笑，但最爆女方唔觉意泄露男方昵称，关系真系唔简单喎！采访：杜杜 摄影：朱伟彦 发型:Terrence Chan @HaiR 化妆:Chloe Yu 场地:Velo Italian Bar & Grill

蔡洁对Bosco有赞冇弹，讲优点讲到停唔到。

蔡洁对Bosco有赞冇弹，讲优点讲到停唔到。

蔡洁对Bosco有赞冇弹，讲优点讲到停唔到。

蔡洁再演「Dr. Fan」跟首演时感觉大不同，但好快投入返角色，「创作时加入蔡洁嘅元素，譬如工作时比较果断，有用唔完嘅精力，将呢啲工作态度放落去。」蔡洁在《法证V》被关楚耀绑架，最后还杀了对方，震撼场面令观众好深刻，今辑两人「续前缘」，阿关演另一角色，但关系依然复杂。问到会否再有震撼场面，她就大卖关子，「阿关演另一个人，一开始只系跟旧阿关生得一模一样，但慢慢发现唔系咁简单，心理上几压抑同恐怖。只可以讲我都会瞓上解剖枱，但会用另一种方法呈现惊栗。」

《法证V》蔡洁被关楚耀绑架，观众印象好深刻。

蔡洁在《法证VI》跟关楚耀再合作。

蔡洁预告《法证VI》会瞓上解剖枱。

赞埋袁伟豪避免尴尬

蔡洁跟Bosco的绯闻传足3年，追问目前关系如何？她就笑得好甜：「我哋都唔知点解会传绯闻，一路都系好好嘅朋友、拍档。」她坦认Bosco作为前辈很照顾她，「Bosco好照顾身边人，系好体贴嘅人，尤其食嘢方面，会煲汤畀大家饮，『波记厨房』就街知巷闻㗎嘞！」2018年，蔡洁签约邵氏首剧《飞虎之雷霆极战》便跟Bosco合作，之后经常在男方身上偷师，「觉得自己嗰时系𡃁妹，跟住阿头、大佬做嘢，一路偷师。男士拍《飞虎》有好多体力上挑战，佢仲整断咗只脚坐住轮椅拍，依然好乐观去接受嗰个状况，好佩服佢，果然做得大佬都有原因。」

蔡洁同Bosco开工，梗系一齐庆祝生日啦！

《飞虎之雷霆极战》时Bosco伤住脚，依然笑着开工。

跟Bosco变熟成为朋友，蔡洁更加佩服对方，「佢除咗拍戏仲要兼顾生意，会好尽力去完成手上嘅事，一个咁成功嘅人都咁努力，我都要更加努力。」追问拍《法证VI》的偷师地方，她再现甜笑，更误泄Bosco昵称，「再讲变咗擦鞋，哈哈！唔好成日净系赞佢，佢同Ben（袁伟豪）都系我前辈，好多人都值得学习，唔单止系Bo Bo（波波）。」呢头讲完唔好再赞，转头又赞Bosco。「佢无时无刻都用个轻松心态面对所有嘢，我见到都会放松啲。」

蔡洁跟「Bo Bo」好合拍又好衬！

蔡洁唔想赞「Bo Bo」太多，所以赞埋袁伟豪。

朝张艾嘉吴君如方向

早前蔡洁自资6位数，以她首本小说《梦的转场机器》的一个故事作蓝本，跟本地漫画家曹志豪合作推出漫画《81》。而读电影出身的她仍有个导演梦，当时她表明想将故事拍成电影，而故事原来亦曾变成电影剧本，「当时睇过呢本书嘅人，话故事特别有电影感，既然大家都觉得有可能发展咪改罗！」可惜最终未能成事，不过她并不心急，「细个啲会急于成事，历练多咗，知有啲嘢唔急得，宁愿等最合适嘅timing，当然会好积极去present、去修改，希望等到时机出现，我可以接得住。」

2019年，蔡洁推出首本小说《梦的转场机器》。

早前蔡洁跟本地漫画家曹志豪合作推出漫画《81》。

若有机会执导，蔡洁讲明不会亲自演出，「𠵱家能力有限，明白专心啲做好一个部门嘅事情好过，香港同内地有好多好演员，真系做到导演时，不如搵啲可以全心全意喺角色上发挥嘅人，我唔使乜嘢都做晒嘅，专心做好导演工作。」最近唱埋剧集插曲《Lost in the Night》，她希望向全能艺人方面发展，朝着张艾嘉和吴君如等方向进发，「知道好作品会影响好多人嘅人生，都抱住呢个初心去工作，相信成功嘅电影工作者，贡献嘅心都好强，唔知自己有冇呢个能力，但希望通过努力可以带到一啲好改变畀观众，就好开心嘞！」

蔡洁有个导演梦，仲要自编自导。

蔡洁有个导演梦，仲要自编自导。