《失控游戏夜》成套戏冇个正常人丨头条戏场

Netflix 出品的电影质素一向超级极度参差，中伏度极高，加上戏名改得差，会令人冇意欲揿入去睇，但我就最锺意抽盲盒，即系锺意玩惊喜，见到德国片《失控游戏夜》有比利时末日剧《绝夜逢生》的靓仔Dennis Mojen，加上好有型嘅女主角Janina Uhse，故事内容都几过瘾，富贵女主角邀请新男友参加有钱小学鸡老友游戏之夜，期间至尊小学鸡前男友不请自来，搞到场面失晒控，有喊声、有鹦鹉叫声、有呕吐声，同埋大量闹交声，总之好嘈。撰文:廖思慧   图片提供:NETFLIX 
 

左系新欢，右系旧爱，中间系有型女主Janina Uhse。

唔知点解玩Game要玩到剥晒衫，但我好欢喜。

男主Dennis Mojen身形好正，呢幕可以不断重睇。

睇预告同故事简介，以为《失控游戏夜》类似电影《今晚玩救你》，后者成班朋友围埋玩Game，然后精心布局神秘谋杀Party，仲请埋老临扮黑社会同警察，越玩越丧。好明显我谂多咗，你只要照字面解《失控游戏夜》就系故事核心，即系失控加游戏夜。

因为狗狗，男女主一见锺情。

玩Game前要做啲仪式，好隆重其事。

一班古怪朋友，个个都有心病。

套戏摄时间一流
Netflix将电影归类为机智风趣、滑稽、喜剧片，冇错嘅，电影的确有以上元素，有啲位仲过份滑稽㖭。男主角只狗公因为唔觉意喺公园误擒女主角只狗女，两人一见锺情继而热恋，电影开场冇5分钟已经有床戏。女主每个月都会有个「良朋欢聚玩Game夜」，热恋情侣一秒都唔想分开，男主跟女友到达朋友间黐鬼线巨大独立屋，未正式玩Game，开单车铺的男主已开始力敌女友甲乙丙丁小学鸡有钱老友，「我男友都系做老板，开单车铺。」全场静过太空。

女主的夫妻老友住嘅大屋，亦系玩Game地点。

玩board game期间最多笑料，因为成班有钱人都唔正常，个个谂嘢谂埋一边，中后期女主前男友加入，原来最黐线系佢。

男主老友(左)忠告男主，去有钱人屋企好易出事。

睇戏重点，男女主角最紧要靓。