梁靖琪凑仔唔打扮阿佘睇唔过眼怒扯发夹后生8年老公常被赞靓仔丨独家

2024-06-14 07:00

梁靖琪（Toby）入行20年受尽负评，终在话题剧《家族荣耀之继承者》演命苦败家千金「Nana」一铺翻身，有网民更以「本人郑重向梁靖琪道歉」为题出po，赞她演技好，加上爸爸兼该剧总监制梁家树畀叻大赞，Toby讲起都眼湿湿。另外，谈到细8年的靓仔老公施隽贤（Jonathan），41岁的Toby承认要keep住状态有压力，更爆笑重演因打扮求其，被好姊妹佘诗曼怒扯发夹一幕。采访：杜杜摄影：Stanley、林宾尼发型:Michael lam@Beijing hair culture 化妆:刘柏麟@Stephenmakeup 服装:farfetch 场地:Bela Offices

Toby入行20年一直在负评中成长，凭「Nana」得到认同令信心大增。

Toby曾因冇自信驾驭角色而拒演「Nana」，「好惊做得唔好，『Nana』冇中间位，又破坏佘诗曼同林峯，好大压力。」因为导演一句，「谂唔到边个做得比你更好」，令她决定一试，但又给自己超大压力，特别是情绪失控戏份，「唔只手震，我拍到缺氧，要跑入厕所呕。」开播时「Nana」不讨好，令她好担心，甚至唔睇留言，「丑系必然，但话差就惊嘞！点解呢？好似返番转头，《蚀日风暴》到《家族1》啲人都话OK喎！睇完留言好大压力，唔想影响情绪，唔开心小朋友会知，到开始有人赞先够胆睇。」

演「Nana」有大量情绪崩溃戏，Toby压力大到作呕。

Toby跟罗嘉良这场「父女」戏，是其中被赞一幕。

曾想转行放弃做幕前

到「Nana」死前戏份，Toby终得到观众认同，更有观众公开向她道歉，令她觉得辛苦都值得。回想入行不久已受尽负评，Toby坦认不好受，「其实好难顶㗎！但观众闹我啲嘢系啱，例如声调、演技，自己慢慢反省，亦有好多人提点我，捱到20年都好犀利，咁样算唔算EQ高呢？！虽然好唔开心，但睇化咗，今次真系赚咗好多。」因为一直被打击，她想过转行，「最想放弃嗰时开咗婚纱及wedding planning公司，但真系好锺意做戏，咪唔好放弃罗！」

身世复杂的「Nana」，惨被哥哥害死。

2010年Toby 开婚纱及wedding planning公司。

因为长期负评缠身，Toby最心痛影响父母，「尤其我做咗妈妈更加明白，嗰时爸爸妈妈叫我唔做呢行，你估佢哋唔伤心咩？！唔出声啫！」今次有好成绩，Toby最感动得到父亲梁家树认同，更讲到眼湿湿，「嗰个网民道歉Po系爸爸send畀我，佢话『你睇吓呢个网民讲乜嘢』，然后畀个叻叻我，好开心，呢个世界实有人锺意同唔锺意我，但屋企人认同系好紧要，特别系我太在乎佢哋，爸爸畀叻叻就好开心。」她打算将经历跟两个囝囝分享，「同佢哋讲，好多人可能会批评你，觉得你唔好，但你唔好放弃。」

Toby被爸爸梁家树赞，忍不住眼湿湿。

Toby得到爸爸梁家树认同，特别感动。

老公后生成扮靓动力

Toby获赞后，对演戏更有信心，但未敢全情投入，始终分别4岁和2岁的囝囝太细。适逢拍摄《家族》期间老公生日，全家陪她到马来西亚开工顺道庆祝。她认为儿子相伴，有助抽离「Nana」沉重情绪，「一入房系Roman同Rian妈咪，就抽离咗，好多场就算系夜戏，返去闻吓佢哋就好放松，舒服晒！」

2019年，Toby跟Jonathan结婚，先后诞下Roman和Rian。

Toby笑指老公Jonathan较她更贪靓。

41岁Toby同33岁老公Jonathan相差8载，两年前她接受本报访问时，正准备生第2胎，当时很担心自己走样，跟老公差距更大，这次见她已回复状态，她笑言多得「Nana」，「佢啲衫好短又薄，有特登减，1星期做足3、4日运动，但系就憔悴咗，出晒眼袋又乾，实在冇完美，希望网民明白。」她笑指老公年轻亦是她努力keep的动力，「老公呢排好勤力，成日做facial又脱癦，我话『你唔使嘛老公，你好细个咋噃，我都未整你整』。」Jonathan经常被网民赞靓仔，她坦认老公比她更贪靓，搞到好姊妹佘诗曼都睇唔过眼，「我真系好求其，我阿妈有时都话我『你真系唔好着到咁样』，但接送小朋友真系好早，我唔理个头，夹个夹就算。」Toby更模仿阿佘发火扯走发夹一幕，「佢好忟憎咁话『你唔好再戴个夹啦』，似唔似呀？我好多表情都学佢，哈哈！」