郑俊弘度好免代沟妙法：介绍囝囝睇星爷自爆做爸爸怪行跑步听歌边跑边喊丨独家

2024-03-08 07:00

郑俊弘（Fred）自囝囝郑赞廷（Asher）出世后，即变「冧仔狂魔」，每日争取亲子时间之馀，还打算搵埋囝囝参与新歌，甚至连听住歌跑步都会因为突然谂起囝囝而边跑边喊。最搞笑是Fred为怕日后同囝囝有代沟已谂定计仔，父子吹水桥梁就系周星驰作品，「将来两父子齐讲星爷台词笑话，就唔会有代沟啦。」先祝佢「冇代沟计划」成功，至于再做老窦，一讲个仔停唔到的Fred确实有计划，亦已跟老婆何雁诗商量好蛇年再生BB 。采访：杜杜摄影：Stanley 发型及化妆:@joanne_starryavenue

Fred很期待将来跟囝囝一齐睇戏玩音乐，现在已开始培养他这方面的兴趣。

Fred提起畀囝囝狂嗲，个样超冧。

Fred提起畀囝囝嗲，个样超冧。

Fred很期待将来跟囝囝一齐睇戏玩音乐，现在已开始培养他这方面兴趣。

Fred形容新剧《再见•枕边人》的「凌振声」是绝对的败家仔，睇剧本时已疑惑角色咁衰可以点演，「成日惊观众唔锺意，同埋会唔会好踩界呢？同导演商量后，享受咗嗰场戏先。」不过他预告角色并非得个坏字，未演过的他觉得特别好玩过瘾，「初睇角色由头憎到佢落脚指尾，但睇落有个转捩点，呢个就要拿捏，点样去铺到最后，原来角色真系有感情，识得去孝顺，希望大家睇到佢系衰，但唔系衰到贴地。」

Fred在《再见•枕边人》饰演败家富二代「凌振声」。

演坏人当反面教材

Fred的囝囝Asher已21个月大，当然未识得睇电视剧，但他也不担心Asher将来见他演坏人，会破坏好爸爸形象，「我咪同佢一齐睇罗！呢啲就唔好做嘞，当反面教材，叫佢睇咗爹哋做啲乖嘅嘢先，譬如《法证先锋》嗰啲可以睇。」他更计划适当时候介绍偶像作品给Asher认识，「有谂几时畀周星驰嘅嘢佢睇，我哋成日讲啲嘢都系围绕住星爷啲笑话，佢唔识就会唔识笑，有代沟。」不过Fred目前很少开电视及智能电话畀囝囝睇，「宁愿播啲歌畀佢听，最好系畀佢玩多啲玩具，佢好锺意弹琴就畀佢弹多啲，畀佢摸多啲嘢，好奇啲。」

Asher个发呆样，真系同Fred饼印一样。

Fred开心Asher对钢琴有兴趣，所以经常让他玩。

新歌预埋囝囝一份

锡仔锡到燶的Fred，音乐作品都打算预Asher一份，「有谂过将来有首歌有一句，或者最尾嗰句系佢唱，用佢把声。」他笑言不担心没有素材，因家人好像追星一样疯狂追拍Asher一举一动，「日日影，有好多相又拍片，老婆又拍，佢婆婆公公又拍，依家有电话系非常好，我问我妈有冇我细个啲相，都系得几张咋，片就真系冇。」Fred坦认做了爸爸连听歌口味都有转变，「以前会听《陀飞轮》，正呀！依家听啲励志嘅歌就会好感动，真系想将最好嘅畀小朋友，佢哋系我哋嘅未来。」他更自爆做爸爸后的怪行，「听Eason首《大个女》，唔知系咪生咗小朋友，真系好感动，跑步时听到『天佑我的爱人』（《每一个明天》）听到喊，但呢首系好开心嘅歌，听到『若我不普通变得坚毅无忌』，又觉得系讲我个仔令到我咁，真系一路跑步一路喊，听呢啲歌有好唔同嘅感觉。」

歌手身份出道10年的Fred，去年推出歌曲《左摇右摆》。

Fred笑指囝囝令一家人着迷，外父外母疯狂帮孙仔影相拍片。

何雁诗离开TVB后，去年为开电视主持亚运。

何雁诗决定重拾高尔夫球运动员身份，准备再参赛。

计划蛇年再做爸爸

提到今年正式带Asher拜年，Fred越讲越兴奋，「今年喺香港过年，好多朋友同屋企人嚟拜年，我哋又带佢出去，帮佢买埋贺年装束，今日做皇帝仔，听日做封利是仔啦，好开心㗎！」早已被Asher融化的他，虽然好想再做老窦，但因何雁诗工作忙碌，生BB要再计划，「尤其是亚运之后，佢做好多唔同嘅综艺节目，又会出歌，同埋会打返高尔夫球比赛，所以今年冇龙仔冇龙女，下年蛇年先生啦！」他现在不用开工便黐着囝囝，还有指定亲子活动，「佢依家开始好嗲好黐身，一嘢成个头瞓落嚟，我每晚都会同佢冲凉，冲凉之前逗佢笑，又会揽住喺床碌嚟碌去，已经玩3、4个字咁耐，冲完抹身搽cream，又同佢按摩，好好服务㗎！」Asher亦令以往恨生女的他完全改观，皆因见到自己的Mini me好过瘾，「生咗仔觉得都好正，我幻想唔到佢系女仔罗！佢有时发呆啲眼神，乜咁似我嘅，所以下个生仔定女都冇所谓。」