陈浩民罕谈旧爱阿佘：佢不嬲系女王 16年前嫌TVB人工奀不欢而散首解画丨独家

2024-02-20 07:00

54岁，曾演过不少经典角色的陈浩民，相隔16年重返娘家拍新剧《状王之王》，客串演「陈梦吉」。咁啱得咁桥，离开TVB 7年的佘诗曼亦回归拍《新闻女王》兼三夺视后成为史上第一人。提到阿佘，坦言少睇电视的人夫陈浩民答得大方：「佢不嬲都系女王，未失败过。」除了罕谈旧爱，陈浩民甚至唔介意跟对方合作拍剧。采访：方骞平摄影：钱文坤场地：QUE＠ELEMENTS圆方

因为识著衫，完全睇唔出陈浩民已54岁。

陈浩民罕谈旧爱阿佘。

陈浩民内地有市场。

陈浩民否认当年跟无綫不和。

陈浩民大门为TVB常开。

陈浩民自2008年拍完古装剧《搜神传》后，便满约离巢转往内地发展，期间TVB从未打他主意，有传当年陈浩民唱TVB人工太奀，搞到不欢而散。重提此事，陈浩民首解画并冇否认：「咁当年外边我有咁多工作做。」访问中，他多次多谢TVB：「冇TVB冇我，今日仍可以喺内地企得住脚，因为《天龙八部》在内地好受欢迎，做人要饮水思源，所以今次拍剧都冇讲钱，当系聚旧。」

陈浩民2008年拍完古装剧《搜神传》后满约离巢。

处男作《天龙八部》同李若彤合作。

陈浩民演过《西游记（贰）的孙悟空。

林子聪带挈拍剧

对于离巢多年，TVB冇再向他招手，陈浩民就如此解说：「虽然我TVB出身，但经已唔系公司人，作为一间大公司当然有佢哋考量。」不过，他强调大门为TVB常开：「我好锺意演戏，只要有戏做，演乜都得。」今次陈浩民能够参与《状王之王》，全因总导演肥仔聪(林子聪)带挈，并非直接由TVB「委任」：「我同肥仔聪拍《济公》，喺片场内我唔系一位八面玲珑嘅演员，只会将心力放晒落场戏，点知搵到知音，两人不谋而合撞出火花，加上我哋拍住上好好彩，面对大制作嘅对手都能逆流而上，抢埋收视冠军，更开埋制作公司。多年来两兄弟会互相关照，有乜好嘢预埋对方。」他又爆两人的窝心经历：「2014年林导几经辛苦搵资金开拍《笑林足球》，有金主肯投资，但附带条件用返佢嘅新人做男一，肥仔聪宁保住我而一口拒绝，真系感动，好彩年多后成事。」

陈浩民回归TVB客串演《状王之王》「陈梦吉」。

林子聪指定要他做《笑林足球》男一。

拍《济公》结成好兄弟。

陈浩民有啲喜感。

在林子聪安排下，陈浩民演终极大Boss「陈梦吉」演得相当过瘾：「虽然只系得45分钟公堂戏，但落力地拍足4日，要用三寸不烂之舌嚟拗赢对方，仲要反派得嚟既搞笑又讨好，真系好考演员魅力，喺语速、语调、感情上都要落功夫，我有加入一啲演《济公》嘅元素。最开心林子聪话我嘅演出，搞到公堂入面个个都睇我演戏，今次演出好好玩，唔够喉。」

陈浩民对王浩信的「宋世杰」赞不绝口。

《济公》令陈浩民红遍内地。

赞阿佘实至名归

2002年陈浩民与佘诗曼合作电影《情缘汽水机》擦出火花，对于旧爱佘诗曼重返TVB拍《新闻女王》威到尽，陈浩民坦言婚后冇睇电视习惯，多年来对娱乐新闻非常冷感，返港定居后屋企连电视机都冇，又唔会click入去睇手机，只知《新闻女王》系hit，但唔知有几hit：「都戥佢高兴，佢不嬲都系女王嚟，套套中未试过失败，预咗系佢攞，所以唔会感意外，系实至名归。」问到日后有冇机会合作？他答得小心奕奕：「呢啲日后先算，唔系我同佢可以做到主，(咁会唔会介意合作？)我冇嘢，拍戏都系一份工作。」他强调家庭生活美满，收工后返归照顾4子女，帮老婆蒋丽莎做直播，又为13岁春春期囡囡做心理辅导。讲到欣赏男艺人，他锺意柏档王浩信，亦喜欢同期出道的陈山聪。再问女艺人呢？他避忌说：「唔熟，要重新留意返，所以答唔出。」