欧镇灏黄浚铭黎展峯笑谈人生目标拍《飞黄腾达》同床瞓10日速变战友丨独家

2024-02-16 08:00

George（欧镇灏）@P1X3L、Boris（黄浚铭）、Andy（黎展峯）在ViuTV剧《飞黄腾达》首合作已同床瞓足10日，相当难忘。对于「飞黄腾达」，三子都有不同定义，Andy认为租到地方开Studio已算；Boris希望拍到一部如《奇异女侠玩救宇宙》的代表作；25岁的George就觉得心中富有最重要，好识谂但跟年龄完全不符。采访：杜杜发型:Terry@Yonda Hair(Boris)、Kevin Liu@myös(Andy) 化妆:Irene　Lee(Boris)、Davina@CyrusLeeMakeUpTeam(Andy) 服装:@armaniexchange(George)、@sense_store(Andy)

剧集共30集拍足半年，George、Boris和Andy由唔熟变老友。

Boris和Andy均首次拍剧，同样认为最难是豁出去。由YouTuber转做演员的Boris说：「拍Youtube唔会咁赤裸骚晒畀人睇，所以令到我好冇自信、好惊。」Andy就因为角色反差大，「角色比较理性，但我系感性啲，好容易跳咗出嚟，带咗自己感受落去演。」

Boris饰演在便利店打工的「Jayden」，梦想成为股神。

剧中George和Boris都好冧Ivy So（苏雅琳）@COLLOR。

冇本钱唔识投资

3人能够熟络，除开拍前剧组安排他们等12个主要演员，跟朱栢谦上了8堂戏剧工作坊外，加上拍摄期间更试过同居。Boris说：「有10日都喺西贡好早开工，索性租咗间酒店，大家瞓埋一张床，因为嗰段时间真系共患难，有咩唔开心就呻，有种革命情义喺度。」Andy补充，「我哋有咩谂唔明，就会去浴缸浸冰水，静思己过。」George都话：「嗰段日子真系好难忘！」

演富二代「Ming少」的George，靠投资比赛证明自己。

3人参加投资比赛，对手戏超多。

因为冇本钱，3人都对投资认识不多，至于心目中的「飞黄腾达」，Andy笑言最希望好似英皇老板一样富有，「梗系想好似杨博士咁啦！但短期可以租到地方做studio已经好满足。」Boris就觉得真正的「飞黄腾达」并非是金钱上，「突然多咗好多亿身家会唔会唔同咗？！我做嘅嘢应该会一样，最想好似A24拍到《奇异女侠玩救宇宙》，就真系飞黄腾达。」George声称睇得好化，心中富有最紧要，「有啲嘢钱未必会买到，必需要经历过同见识过，所以我唔会谂咩代表作，每个作品100%咁做，再睇返觉得不足就改。」