郑启泰逝世丨新城制作纪念特辑！未婚妻王雁芝罕谈相识经过：老公，I love you
2024-02-07 20:30 
新城电台DJ郑启泰上周六（3日）惊爆死讯，终年56岁。郑启泰生前于1988年加入成新城电台DJ，虽然在2023年曾短暂离开，但今年1月再度回巢，可惜最后效力不足一个月便猝逝，实在令人感到欷歔。今日（７日）新城为郑启泰制作了《怪你过份美丽》纪念特辑，其未婚妻王雁芝首度开腔忆述二人相识经过，坦言会继续延续佢嘅快乐，成为Eric 2.0。
相关文章：郑启泰逝世丨未婚妻王雁芝连环尽诉不舍之情 忆浪漫往事：有你是我最幸福的事
王雁芝郑启泰甜蜜往事：
在节目上，由郑启泰生前四个徒弟T-Max、林伽遥、麦皓儿和梁乐童联合主持，他们坦言：「留咗个位畀，当佢睇紧直播，听朋友嘅说话。」林伽遥当日有份见证郑启泰向女友王雁芝求婚并说：「佢成日赞女友一个好纯嘅女仔，相信王雁芝亦深深感受到对男友对佢嘅爱意，肯对佢作出呢个承诺。」王雁芝今次亦有分享昔日与未婚夫的相识经过：「识郑启泰嘅朋友都知道，佢系好锺意整蛊人，呢次真系大整蛊，先求婚，跟住自己走咗去唔理我，好多朋友都话点解你可以咁坚强，你要喊就喊喇，我话其实我已经喊完，喊完咪笑番罗，我记得我每次喊，佢都会话：『全世界最丑样系你，快啲笑番喇，吓死人咩』，其实我系畀佢访问嗰阵认识，一开始对呢个人冇乜好感，亦都唔锺意佢，又唔打招呼，但系识落再同佢拍拖，觉得呢个人好特别，好识享受人生，佢会开住音乐跳舞扫地，又会带我去铜锣湾油站对面，开张枱野餐，亦会自制Menu在我擦牙时贴在窗写：「Chef Eric’s menu of tonight With unlimited kisses and hearts !( 厨师Eric是日精选 无限个锡锡同心心) ，系咪好浪漫呢！」
王雁芝自觉幸福陪未婚夫走到最后一步
王雁芝亦表示郑启泰曾经表明不想结婚：「居然可以令到呢只冇脚嘅雀仔向我求婚，我仲记得当晚佢同我讲『老婆，以后记得叫我做老公喇！』系咪真系估佢唔到。识咗佢呢二年，真系我人生之中最开心，最自在最幸福同最浪漫，我好开心可以识到佢，我系the lucky one and the last one，可以陪佢行到最后一秒，虽然佢已经唔喺度，但系我会继续延续佢嘅快乐，成为Eric 2.0，继继续开心咁生活落去，继续佢乐观嘅性格。爱情系人生嘅长跑，但系今次我呢位人生嘅长跑选手，竟然入咗条短跑嘅跑道，可能我哋爆发力太强，爱得太轰烈，但系我相信不在乎天长地久，只在乎长期心里拥有，I love you郑启泰，老公，I love you！」
徒弟之一的林伽遥说：「佢成个family嘅关系都好好，成日赞妹妹，话佢好靓，好多人追，作为肥仔哥哥要保护佢，帮佢挡住啲飞来蜢。我哋初初识佢系做好多晚上节目，后期冇再做嘅原因系为改想多啲时间陪屋企人，喺过去嘅两年，佢爸爸患上癌症，最后抗癌成功，妹妹出咗一绘本书， 除咗筹款，仲讲咗佢哋一家人嘅抗癌历程。」林伽遥续说：「佢亦都有提到个女，试做带货节目，佢都有叫个女帮手，不过唔系因为冇人帮手，只系想多啲同个女相处，畀个女知道爸爸做紧啲乜嘢，等佢见识多啲。」接着其他人亦说：「我哋做节目，佢都会分享下个女去咗边度留学，佢哋又会一齐去饮酒，又会鼓励个女拍多啲拖，喺失恋度攞经验，真系好前卫。」
郑启泰妹妹赞哥哥系郑家嘅骄傲
接着播出郑启泰妹妹Fiona的录音：「相信大家可以估到，有一个好似Eric咁嘅哥哥，作为细妹嘅我，童年一定充满刺激，佢永远充满创意去吓我、呃我同整古我，我嘅成长简直系活在莫名奇妙之中，不过同一时间，佢亦照顾我，带我返学，帮我紥辫、补鞋，煮饭畀我，又保护我，简直有少少精神分裂。长大后我哋各自追梦但系又一同创作，我自信我哋系世间少有嘅好兄妹。今次真系估唔到，咁潇洒走咗翔天际，我好似听到佢最锺意讲嗰句：『得，不过呢啲我唔识，你会帮我搞掂佢！』好，我会做得漂漂亮亮，帮你搞掂佢，你系我哋郑家嘅骄傲！」
点击睇艺人悼念郑启泰：
薛家燕珍惜郑启泰新书
另一方面，与郑启泰同样在新城开咪的薛家燕说：「当我接到郑启泰离去消息，我心里面真系好难过，当晚辙夜难眠，点解咁呢？因为大家做同事已经超过十几二十年，郑启泰畀我哋感觉真系好和蔼可亲，好幽默，而且好多嘢我哋可以向佢学习，因为佢真系一个好成功，好资深DJ，我记得旧年，佢话会出一本书，叫做『如何七日成日演说高手』，启泰就话：『家燕姐呀，帮我写序呀！』」咁我就话：『哗吓！我点识写呀！我真系好多嘢要向你学习！』佢就话：『唔系呀，家燕姐，你有好多方面唔同做法呀嘛！你帮我写个序，支持我啦！』我真系帮佢写咗个序，佢仲送番本书俾我，我攞本书时，佢当然话多谢我，我反而话：『我多谢你呀！』呢本书对我嚟讲系好好学习机会，我会好珍惜，慢慢睇。」
家燕姐续说：「佢除咗和蔼可亲、幽默感之外，佢好锺意帮助人，当我哋一、两年前，我哋要做网上直播，乜都唔识，好多时要请教佢点样做，用咩仪器，佢一一不厌其咁教我哋，佢仲连埋仪器借埋畀我哋用，所以佢系一个好难得、好难得的好DJ，同埋好同事。」她还称：「记得有一日，因为佢离开咗新城电台成半年，佢突然Whatsapp我同我讲：『家燕姐，我可能返嚟同你做同事呀！』我即刻问系咪真架？我系好开心，所以喺1月30日，我哋一齐拍贺年节目，大家系拥抱，而佢仲话要锡番我一啖，其他同事喺度讲笑：『哗吓，咁我哋咁开心呀！我就话：『系呀，真系好开心，见番郑启泰，佢返嚟我哋啲气氛都开心好多，嗰日我哋仲大家一齐互相恭贺，唉，估唔到突然间收到去世消息，真系好难过、好难过！唯一系感觉安慰，佢唔使受长期病痛之苦就离去，不过，我真系要同启泰讲一声：我哋真系每一个同事都好怀念您！好难忘记您带畀我哋嘅欢乐！启泰，希望您一路好走！主怀安息！我哋永远怀念您！」
此外，在节目开始前，新城知讯台台长程凯欣表示不少圈中好友包括乐易玲、薛家燕、伍咏薇、姚嘉妮等亦特意以录音悼念郑启泰，事后会将特辑制成光碟送给郑启泰的家人作纪念。T-Max表示视对方为师父，赞他为人有义气，麦皓儿在访问期间数度听不住落泪，哽咽表示他是一个好好的大哥哥和前辈，觉得很突然未能接受。新加入的主持梁乐童形容郑启泰是第二个爸爸。
其他文章：
郑启泰逝世丨《中年好声音2》悼念故友！曾任旁白报幕工作：好似一家人
郑启泰逝世丨未婚妻王雁芝首开腔！原计画健身影结婚相 死因需解剖厘清吁勿作揣测
郑启泰逝世丨未婚妻王雁芝丧夫后首曝光！面容略见憔悴与郑启泰妹妹见医生
-----------------------------
《星岛申诉王》已推出全新项目「区区有申诉」，并增设「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰ https://bit.ly/3uJ3yyF
想睇更多精彩内容，请立即浏览「区区有申诉」活动专页，https://bit.ly/41hgS9E
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应